Astananyń shet aýdandarynda Naýryz meıramy toılanýda

ASTANA. QazAqparat - Astana mańyndaǵy turǵyn alaptarynda Naýryz meıramy toılaý sharalary bastaldy, dep habarlaıdy Astana qalasynyń mádenıet, muraǵattar jáne qujattama basqarmasy.

Basqarma ókilderi taratqan málimetterge qaraǵanda, tańerteńnen bastap Mıchýrıno jáne Kúıgenjar eldi mekenderinde kontsertter ótip jatyr. Dosymjan Tańatarov, Dos, Marjan Arapbaeva, Salyqovtar áýleti, «Alaman» trıosy, Ásem Omarova, «Saryrqa» toby, «Dıart» trıosy, «Іńkárim» bı ujymy jáne taǵy basqalar kópshilikke kóterińki kóńil-kúı syılaýda.

Jergilikti turǵyndar Naýryz merekesin toılaýǵa belsene qatysýda - barshaǵa arnap et, baýyrsaq, Naýryz kóje sııaqty ulttyq taǵamdarmen mol dastarhan jaıyldy, oqýshylar qazaqstandyq estrada juldyzdarymen bir sahna tórinde óner kórsetýde.

Mıchýrıno men Kúıgenjarda merekelik sharalar barysynda ájeler jas býynǵa «Bata berý», «Tusaýkeser», «Besikke salý» syndy salt-dástúrlerimizdi ótkizýdi úıretip, «Qyz qýý» oıyny uıymdastyryldy.

Bıyl Astanada da, qalanyń mańyndaǵy turǵyn alaptarynda da Naýryz meıramyn atap ótýge basa nazar aýdarylyp otyr. Búgin, 19 naýryzda saǵat 11:00-de «Promyshlennyı» turǵyn alabynda «Qosh keldiń, áz Naýryz!» merekelik kontserti, «Internatsıonalnyı» turǵyn alabynda «Naýryz berekem» sharasy ótedi. «Jeleznodorojnyı» turǵyn alabynda Naýryz merekesi 20 naýryzda toılanady. 21 naýryzda merekelik kontsertter men sharalar «Prıgorodnyı» jáne Úrker (Ilınka) turǵyn alaptarynda, 22 naýryzda Kóktal-1, Kóktal-2 jáne Óndiris turǵyn alaptarynda uıymdastyrylady.