Astananyń ortalyǵynda «GGG - ChEMPION» degen mańdaısha jazýy paıda boldy
«GGG Chempıon!!!! Máńgilikke! Bul jazý búgin saǵan arnalǵan, Gena !!!!», - dep jazdy Saryarqa aýdanynyń ákimi Arman Turlybek.
Áleýmettik jeli paıdalanýshylary óz pikirlerinde Gennadıı Golovkın mansabyndaǵy alǵashqy jeńiliske ushyraǵanyna qaramastan, osyndaı nazarǵa laıyq ekenin jazýda.
Qazaqstan jurtshylyǵy men memleket qaıratkerleri Gennadıı Golovkınge úlken qoldaý kórsetti.
Osylaısha, QR Parlamenti Senatynyń depýtaty Qasym-Jomart Toqaev Tvıtterge bylaı dep jazǵan: «Maǵan da Golovkın bul jekpe-jekte azdaǵan basymdyq tanytyp, jeńgeıdeı bolyp kórindi. Alaıda tóreshilerdiń pikiri ózgeshe bolyp shyqty, oǵan qarsylyq bildirýdiń mańyzy shamaly. GGG Qazaqstandy álemdik arenada tanytýǵa zor úles qosty, sondyqtan marapatqa ábden laıyq!»
Al QR Mádenıet jáne sport mınıstri Arystanbek Muhamedıuly Qazaqstan halqynyń batyr Genaǵa degen mahabbaty taýsylmaıtynyn aıtty. Ánshi Dımash Qudaıbergen de otandasyn rıngtegi jeńilisinen keıin qoldap, Instagram jelisinde Qazaqstandy tanytýyna qosqan úlesi úshin alǵysyn bildirip jazdy.
Buǵan deıin, Gennadıı Golovkın men Saýl «Kanelo» Alvarestiń rematchy qarsańynda Astanadaǵy Samal shaǵyn aýdanynyń úılerinde «Alǵa, GGG!», «Vpered, GGG!» dep jazylǵan janatyn júgirtpe jol paıda bolǵan edi.
Eske salaıyq, 15 qyrkúıek kúni Las-Vegastegi T-Mobile Arena-da qazaqstandyq Gennadıı Golovkın men Meksıkalyq boksshy Saýl «Kanelo» Alvares qarymta jekpe-jek ótkizdi. Keshegi kezdesý boksshylardyń ótken jyly teń túsken kezdesýinen keıingi ekinshi jekpe-jegi boldy. Osy joly tóreshilerdiń sheshimine sáıkes, meksıkalyq 114-114, 115-113, 115-113 esebimen aıqastyń jeńimpazy atandy. Bul - GGG úshin kásipqoı bokstaǵy 38 jeńisi men bir teń dárejede túsken oıynnan keıingi alǵashqy jeńilisi.