Astananyń quqyq qorǵaýshylary kúsheıtilgen rejimge kóshedi

ASTANA. QazAqparat - Astana kúni qarsańynda elordanyń quqyq qorǵaýshylary, sondaı-aq úsh oblystyń jeke quramy kúsheıtilgen rejimge kóshetin bolady, dep xabarlaıdy QazAqparat tilshisi.

QR ІІM Memlekettik til jáne aqparat departamentiniń dırektory Almas Sadýbaevtyń aıtýynsha, 27 maýsym men 8 shilde aralyǵynda astanalyq garnızon, sondaı-aq Aqmola, Qaraǵandy jáne Pavlodar oblystarynyń jeke quramy kúsheıtilgen rejimge kóshiriletin bolady. «Ol kúnderi elorda aýmaǵynda qoǵamdyq tártipti polıtsııanyń kúsheıtilgen jasaqtary baqylaıdy. Al merekelik sharalar ótetin jerlerde táýlik boıy kezekshilik júrgiziledi», - dedi A.Sadýbaev Astanada ótken baspasóz máslıxatynda.

Onyń aıtýynsha, jedel shtabtar da qurylady. Al qalalyq, oblystyq jáne aýdandyq bólimshelerde qosymsha jedel tergeý toptary jasaqtalady. Negizgi maqsat - qylmystarǵa qatysty shuǵyl áreket jasaý. «Jalpy, mereke kúnderi qoǵamdyq tártipti qorǵaý sharalaryna 3,5 myń polıtsııa qyzmetkeri atsalysady. Olardyń ishinde 1,2 myń Ulttyq ulannyń sarbazy bar. Budan bólek, qosymsha rezerv jasaqtalady. Memlekettik mańyzy bar nysandardy kúzetý sharalary kúsheıtiledi. «Báıterekti» de biz táýlik boıy kúzetemiz. Astananyń aınalma joldary da baqylaýǵa alynady. Ol úshin qosymsha beketter qoıylady», - dep atap kórsetti A.Sadýbaev.