Astananyń qaı bóliginde turǵyndardyń lıftige kóp shaǵymdanatyny anyqtaldy

ASTANA. QazAqparat - Búgin Parlament Májilisiniń depýtattary Sapar Ahmetov pen Bekbolat Tileýhan «iKomek monıtorıng jáne jedel áreket etý ortalyǵy» MKM jumysymen tanysty, dep habarlaıdy QazAqparat.

Ortalyq qyzmetkerleri qala turǵyndary kóbine qandaı máseleler boıynsha ótinimder jasaıtyndyǵy týraly aıtyp berdi.

«Jalpy, qalada bizge tıesili barlyq salalardy qamtyp kelemiz. Máselen, jyl basynan beri lıftige qatysty bizge 2 114 ótinim kelip tústi, onyń ishinde qazirgi kezde 11-i boıynsha jumystar atqarylýda. Eń kóp ótinimder Almaty aýdanynda tirkeldi. Ózderińiz bilesizder, Baıqońyr men Almaty jaqynda ekige bólindi. Bul rette, atalǵan aýdandarda lıftiler boıynsha shaǵymdardyń kóptigin eskere otyryp, olardyń aýmaǵynda eski úıler basymyraq ekenin baıqaýǵa bolady», - dedi iKomek monıtorıng jáne jedel áreket etý ortalyǵynyń jetekshisi Jannat Dýbırova.

Sonymen qatar ol abattandyrý máseleleri aıasynda turǵyndar tarapynan habarlamalar jıi túsetinin jetkizdi.

«Atap aıtqanda, jol ınfraqurylymyna qatysty 2 116 ótinim tússe, sonyń ishinde 103-i boıynsha jumystar atqarylýda. Osy oraıda qaı mekemeler jumys merzimin asyryp jibergenin kórip turamyz», - dedi J. Dýbırova.

Onyń sózine qaraǵanda, qala turǵyndary tarapynan jolaýshylar jolaǵyn ornatý, jol sapasyna baılanysty habarlamalar óte kóp keledi.

Aıta keteıik, ortalyq 2017 jyly «109 kezekshilik qyzmeti» MB men Astana qalasy ákimdiginiń jaǵdaılyq baqylaý ortalyǵynyń beınebaqylaý monıtorıngi tobynyń birigýi aıasynda qurylǵan edi. Atqarylatyn jumystyń basty maqsaty - apattar men jazataıym oqıǵalardyń aldyn alý úshin kommýnaldyq jáne jedel qyzmetterdiń jumysyn úılestirý ári baqylaý. Sonymen qatar, ortalyqta azamattardyń ótinimderin qabyldaý iske asyrylady. Onda qala boıynsha ornatylǵan 4 myńnan asa beınebaqylaý qurylǵylary basqarylady.