Astananyń bıylǵy bıýdjeti naqtylandy

NUR-SULTAN. QazAqparat – Ózgertýlerdi eskergen kezdegi elordanyń naqtylanǵan bıýdjeti – 867 mlrd 234 mln teńge boldy. Bul týraly Nur-Sultan qalalyq ekonomıka jáne bıýdjettik josparlaý basqarmasynyń basshysy Qaısar Manqaraev málim etti, dep habarlaıdy QazAqparat tilshisi.

«Іs júzindegi túsimge júrgizilgen saraptamaǵa sáıkes, jergilikti kiriske qatysty jospardy boljammen 50 mlrd teńgege arttyra otyryp, 534,8 mlrd teńgege jetkizý usynylady. Onyń ishinde salyq túsimderi – 40 mlrd teńgege, salyq emes túsimder – 4,8 mlrd teńgege, al negizgi kapıtaldy satýdan túsetin túsim – 5,2 mlrd teńgege artyq bolady», - dedi Qaısar Manqaraev qalalyq máslıhattyń qoǵamdyq keńesi otyrysynda.

Basqarma basshysynyń dereginshe, engizilgen ózgertýlerdi eskergen kezdegi elordanyń naqtylanǵan bıýdjetiniń jalpy kólemi bıyl – 867 mlrd 234 mln teńge.

«Onyń ishinde jergilikti kiris túsimi – 534 mlrd 862 mln teńge, respýblıkalyq bıýdjetten transfert túrindegi túsim – 236 mlrd 927 mln teńge, zaım túsimderi – 32 mlrd 167 mln teńge, sonymen qatar qaldyq qarajat – 63 mlrd 277 mln teńge mólsherinde bolady», - dedi ol.