Astananyń bilim berý uıymdarynda 57,4 mln teńge zańsyz paıdalanylǵan
Statıstıkaǵa súıensek, bilim berý - sybaılas jemqorlyq eń kóp taraǵan salalardyń biri jáne ol qylmystyq quqyq buzýshylyqtar sany boıynsha jetekshi oryndarda tur. Kóbinese qylmysty oqý oryndarynyń dırektorlary men esepshileri, bilim bólimderiniń basshylary men qyzmetkerleri jasaıdy. Osy másele júıeli sıpatqa ıe jáne joıylýy tıis ekenin eskere otyryp, agenttiktiń bastamasymen departament bilim basqarmasymen birlesip sybaılas jemqorlyq táýekelderine taldaý júrgizdi.
Búgin elordada mektepke deıingi, orta, tehnıkalyq jáne kásiptik bilim berý uıymdary basshylyǵy men esepshilerdiń qatysýymen bilim berý salasyndaǵy taldaý nátıjeleri jarııalandy. Belgili bolǵandaı, astanalyq mektepterdiń esepshileri men dırektorlary bilim berý uıymdarynyń jalpy somasy 57,4 mıllıon teńge bolatyn qarajatyn zańsyz ıemdengen. Munyń ishinde 29,6 mıllıon teńgege jýyq soma óteldi.
Departament basshysynyń birinshi orynbasary Aıtýar Aǵybaev óz sózinde agenttik Oqý-aǵartý mınıstrimen birge sybaılas jemqorlyq táýekelderin joıý boıynsha jol kartasyna qol qoıǵanyn habarlady.