Astananyń aýdandarynda Jumyspen qamtý ortalyǵynyń ókildikteri ashyldy

ASTANA. QazAqparat - Astana qalasynda Jumyspen qamtý ortalyǵynyń úsh ókildigi ashyldy. Munda jumys izdeýshiler málimetter bazasyndaǵy bos oryndarmen tanysyp, suhbattasýǵa joldama alady. Sonymen qatar, mamandar jastar praktıkasynan, daıarlaý jáne qaıta daıarlaý kýrstarynan ótý jaǵdaılary men qajetti qujattar toptamasy týraly keńes beredi, dep habarlaıdy qalalyq ákimdiktiń baspasóz qyzmeti.

Jumyspen qamtý ortalyǵynyń dırektory Oljas Omardyń aıtýynsha, ókildikter jumysqa ornalaspaǵan azamattardyń qolaılyǵy úshin jasalyp otyr.

- Ókildikterdiń ashylýyna jumysqa ornalasý salasynda jumyssyz azamattardy memlekettik qoldaý sharalarymen kóbirek qamtý qajettiligi negiz bolǵan. Eń bastysy, halyqqa turǵylyqty jerinde memlekettik qyzmettiń osy bir túrin alý óte qolaıly bolyp tabylatyndyǵy, - deıdi Oljas Omar.

Jumyspen qamtý ortalyǵynyń ókildikteri Tilendıev dańǵylynyń boıynda ornalasqan «Rahmet» SÚ, Aqjol kóshesindegi «Astyqjan» SÚ jáne «Arýjan» SOO ashyldy.

Eske sala keteıik, buǵan deıin «Astanalyq» bazarda jáne «Gúljan» SÚ osyndaı 2 ortalyq óz jumysyn bastaǵan bolatyn. Bul jumyssyzdyqtyń eń tómengi deńgeıin 4,7% shamasynda saqtaýǵa múmkindik beredi.