Astananyń aýa tazalyǵyn fındik tehnologııamen tekseredi
Aıta ketken jón, búginde Astanadaǵy aýanyń tazalyǵyn reseılik qondyrǵylar baqylaıdy. Alaıda osy sanattaǵy tehnologııanyń gaz analızatorlaryn ornatý úshin arnaıy jer ýchaskesi kerek. Sol jerge temir qorap ornatylady. Al fındik datchıkterdiń basty artyqshylyǵy sol, ony ornatý úshin jer ýchaskesin bólýdiń qajeti joq. «AQT-420»-ny kez kelgen jerge, tipti baǵanaǵa da bekitýge bolady. «Datchıkterdiń dáldigi 1-3 paıyzdy quraıdy. Sonyń arqasynda azot dıoksıdi, kómirtek oksıdi, kúkirt dıoksıdi jáne taǵy basqa aýany lastaıtyn zattardyń kontsentratsııasyn ólsheýge múmkindik bar. Alaıda fındik tehnologııanyń kemshilikteri de joq emes. Máselen, qazirgi komplektatsııada azot oksıdi men kúkirt sýtekti anyqtaý múmkin emes. «Viasala Group» kompanııasy jyldyń aıaǵyna deıin qosymsha sensorlardy ornatyp, atalǵan eki zattyń kontsentratsııasyn da ólsheý fýnktsııasyn engizbekshi. Sol kezde biz reseılik jáne fındik tehnologııany salystyryp kóremiz», - deıdi «Qazgıdromet» RMK zerthana basshysy Dana Amanbaeva.
Onyń aıtýynsha, qosymsha sensorlar ornatylmaı turǵanda jańa tehnologııanyń naqty baǵasyn aıtý qıyn. Jyldyń sońynda eki kompanııanyń ónimderin salystyrǵanda tehnıkalyq artyqshylyǵyna ǵana emes, qarjylaı shyǵyndaryna da basa nazar aýdarylady.
Degenmen, qazirdiń ózinde fındik tehnologııanyń tıimdiligi anyq baıqalady. Birinshiden, datchıkterdi kez kelgen jerde ornatýǵa bolady. Ekinshiden, oǵan energııa jumsalmaıdy. Sebebi atalǵan tehnologııa kún kózinen qýat alady.
Aıta keteıik, jaqynda Úkimet úıinde ótken baspasóz máslıhatynda QR Energetıka vıtse-mınıstri Maǵzum Myrzaǵalıev Astanadaǵy EKSPO-2017 kórmesinde tanystyrylǵan texnologııalardyń ishinen 105 joba iriktelgenin málimdedi. Sonyń ishinde aýa tazalyǵyn baqylaıtyn fındik qurylǵylar da bar .