Astananyń «Almaty» aýdanynda 16 turǵyn úı kesheni salynýda

ASTANA. QazAqparat - L.N.Gýmılev atyndaǵy Evrazııa ulttyq ýnıversıtetinde Astana qalasynyń «Almaty» aýdanynyń ákimi Bekbol Saǵynnyń qala turǵyndarymen esep berý kezdesýi ótti. Kezdesý barysynda turǵyn úı kommýnaldyq sharýashylyǵy, PIK máselelerine jáne aýdandaǵy joldar men kósheler jaǵdaıyna erekshe kóńil bólindi, dep habarlaıdy elorda ákimdiginiń baspasóz qyzmetinen.

Eseptik kezdesýge Astana ákiminiń orynbasary Ermek Amanshaev, QR Parlamentiniń depýtattary, qalalyq máslıhat depýtattary men astanalyq qoǵam qaıratkerleri qatysty. Jyl qorytyndysyn shyǵarǵan Bekbol Saǵyn aýdannyń qarqyndy damyp kele jatqanyn atap ótti. 2014 jyly aýdanda jalpy aýdany 500 sharshy metrlik 9 turǵyn úı kesheni paıdalanýǵa berilgen. Qazirgi ýaqytta taǵy da 16 turǵyn úı kesheniniń qurylysy júrip jatyr. Aýdan ákiminiń aıtýynsha, TKSh-ny jańǵyrtý baǵdarlamasy aıasynda 4 jyldyń ishinde aýdanda 31 turǵyn úıge jóndeý jumystary júrgizilgen, sonyń ishinde 13 úı byltyr jóndeldi. Bıyl páter ıelerimen birge 18 turǵyn úıdi jóndeý kózdelgen. Bekbol Saǵyn osybaǵyttaǵy jumystar jalǵasyn tabady dep sendirdi. Kezdesý barysynda qoıylǵan suraqtar turǵyn úı kommýnaldyq salasyn (jylý eseptegish quraldardy ornatý, PIK jumysy, tarıfterdi jasaý erejesi jáne t.b.), balabaqshalardaǵy kezek máselesin, joldar men kósheler qurylysyn, sonymen qatar qoǵamdyq kólik jumysy máselelerin sóz etti. Aýdan turǵynynyń balabaqshaǵa kezektiń baıaý jyljýy jónindegi suraǵyna jaýap bere otyryp, ákim balabaqshalarǵa tirkeý qatań túrde kezekpen júzege asatynyn jetkizdi. Balalardy mektepke deıingi bilimmen qamtamasyz etý úshin bıyl taǵy da 7 balabaqsha ashylady dep josparlanǵan. Kezdesýde PIK jumysy, keıbir kósheler men aýlalarǵa kiretin joldar salý, sonymen qatar qosymsha baǵdarshamdar men jaıaý júrginshilerge arnalǵan joldar salý boıynsha suraqtar qoıyldy. Kezdesý qorytyndysy boıynsha turǵyndardyń árbir suraqtaryna ókiletti organdardyń ókilderi jaýap berdi, keıbir suraqtarǵa jaýaptar jazbasha túrde jiberiletin bolady.