Astananyń 500 stýdenti zııandy ádetterge qarsy aktsııaǵa shyqty
19:44, 19 Qyrkúıek 2012
ASTANA. 19 qyrkúıek. QazAqparat - Qazaqstan stýdentteri alıansy men QR ІІM-niń Ákimshilik polıtsııa komıteti pikirles 500 stýdenttiń basyn qosyp, adamzattyń eń zııandy ádetterine qarsy shara uıymdastyrdy.
«Stýdentter qarsy!» atty shara Astanadaǵy S.Seıfýllın atyndaǵy Agrotehnıkalyq ýnıversıtette bastalyp, uıymdastyrýshylardyń oılastyrýy boıynsha barlyq el boıynsha taralýy tıis.
Belsendi jastarmen kezdesip, olardy qyzyqtyrǵan saýaldarǵa jaýap berý úshin elordalyq polıtseıler keldi. Sonymen qatar stýdentter arnaıy maqsattaǵy jaýyngerlerdiń operatsııalarda qoldanatyn biregeı kórsetilimderin tamashalady. Astana qalalyq ІІD-niń «Arlan» arnaıy maqsattaǵy toby jastarǵa arnaıy úıretilgen ıtter arqyly esirtki zattaryn tintýdiń barlyq syrlaryn ashyp berdi.
Sharanyń sońynda S.Seıfýllın atyndaǵy Agrotehnıkalyq ýnıversıtetiniń stýdentteri atalmysh bastamany qoldaýǵa shaqyrdy.