Astananyń 5 076 jas otbasy «Qoljetimdi baspana-2020» baǵdarlamasyna qatysatyn boldy

ASTANA. QazAqparat - 5 439 jas otbasy «Qoljetimdi baspana-2020» baǵdarlamasyna qatysýǵa nıet bildirip, 2014 jyly 2-14 maýsym aralyǵynda Astana ákimdigine HQKO arqyly ótinish jasaǵan, dep habarlady qala ákimdiginiń baspasóz qyzmetinen.

2014 jyly 17 shildede Astana qalasynyń ákimdigi janyndaǵy turǵyn úı komıssııasynyń «Qoljetimdi baspana-2020» baǵdarlamasy aıasynda úılerdi qoldanysqa berý boıynsha otyrys ótti. Onda jas januıalardyń ótinishteri qaraldy.

Nátıjesinde 5 076 jas otbasy baǵdarlamaǵa qatysý múmkindigine ıe bolyp, olarǵa tıisti upaılar taǵaıyndaldy.

Sondaı-aq, jas januıalardyń qujattaryn qaraý barysynda turǵyn úı komıssııasy baǵdarlamaǵa qatysý talaptaryna jaýap bermeıtin 343 januıany anyqtaǵan. Olardyń ótinishteri maquldanbady.

«672 páterdiń kiltin berýge turǵyn úı komıssııasy bekitken azamattardyń tizimi Astana qalasy ákimdiginiń saıtynda (astana.gov.kz), Astana qalasynyń turǵyn úı basqarmasynyń saıtynda (www.uzh.astana.kz) jáne BAQ-ta jarııalanady, delingen habarlamada.