Astananyń 25 jyldyǵyna oraı júlde qory qomaqty jyr dodasy ótedi

ASTANA. UazAqparat – Astana qalasynyń 25 jyldyq merekesine oraı «Jasaı ber, jaınaı ber, Astana» atty respýblıkalyq jyr múshaırasy ótedi, dep habarlaıdy QazAqparat tilshisi.

Sharany «Tarıhı mádenı murany saqtaý jáne paıdalaný ortalyǵy» uıymdastyryp otyr.

«Astanamyzdyń 25 jyldyq toıyna arnalyp jarııalap otyrǵan bıylǵy múshaıranyń máni, tipti erekshe. Astanany jyrlaý – azattyqty jyrlaý, tarıhymyzdy jyrlaý, ult bolashaǵyn jyrlaý, táýelsizdik jolynda qurban bolǵan erler rýhyn jyrlaý dep bilgenimiz jón. Sondyqtan da bıylǵy múshaıranyń taqyryp aıasy barynsha keń. Júlde qory da óte qomaqty. Ádiletti Qazaqstan qurýǵa bet buryp otyrǵan tarıhı kezeńde aqyndardy osy dúbirli jyr báıgesine qatysýǵa shaqyramyz», - delingen uıymdastyrýshylar taratqan habarlamada.

Jyr dodasynda top jarǵan júldegerlerge tómendegideı qarjylaı syıaqylar beriledi:

Bas júlde – 3 300 000.

Birinshi oryn – 2 200 000.

Ekinshi oryn ekeý – 1 100 000.

Úshinshi oryn úsheý – 660 000.

Yntalandyrý syılyǵy beseý – 330 000.

Músháıraǵa esh jerde jaryq kórmegen óleńder, tolǵaýlar qatysa alady. Úmitker shyǵarmalar 2023 jylǵy 15 maýsymǵa deıin qabyldanady. Músháıra qorytyndysy Astana kúni qarsańynda jarııalanyp, marapattaý rásimi 30 maýsym kúni Astana qalasynyń «Jastar teatrynda» ótedi.

«Úmitkerler shyǵarmasyn kompıýterde terip, tómendegi meken-jaıǵa jiberý kerek. Nemese elektrondyq poshtaǵa joldaýǵa bolady. [e-mail], Astana qalasy, «Tarıhı mádenı murany saqtaý jáne paıdalaný ortalyǵy». Otyrar kóshesi 1/2 úı. INDEKS: 010000, Avtordyń aty-jóni, meken-jaıy, baılanys telefony, elektrondyq poshtasy mindetti túrde kórsetilýi kerek», delingen habarlamada.