Astananyń 20 jyldyq mereıtoıyna oraı EQYU-da fotokórme ashyldy

VENA. QazAqparat - Eýropadaǵy qaýipsizdik jáne yntymaqtastyq uıymynyń shtab-páteri ornalasqan Hofbýrg kongress-ortalyǵynda Astananyń 20-jyldyǵyna oraı fotokórme uıymdastyryldy, dep habarlaıdy QazAqparat QR syrtqy ister mınıstrliginiń baspasóz qyzmetine silteme jasap. 

Fotokórmeniń ashylý saltanatyndaǵy sózinde Qazaqstannyń Vena qalasyndaǵy halyqaralyq uıymdar janyndaǵy Turaqty Ókili Qaırat Sarybaı Astananyń kópjaqty dıplomatııa men bitimgershiliktiń iri halyqaralyq ortalyǵyna aınalǵanyn atap ótti. Osy oraıda, 2010 jyly Astanada EQYU qatysýshy memleketteriniń «erkin, demokratııalyq, ortaq jáne bólinbes eýroatlantıkalyq jáne eýrazııalyq qaýipsizdik qoǵamdastyǵyn» qalyptastyrý qaǵıdatyna múddeliligin bildirgen EQYU tarıhı sammıtiniń rólin atap ótti.

Qazaqstandyq dıplomat «Eýrazııa júregindegi zamanaýı, qarqyndy damyp kele jatqan qala beıbitshilik, qaýipsizdik pen damýdy nyǵaıtýda aldaǵy ýaqytta da úlken ról atqarady», - dep málimdedi.

Qazaqstan Respýblıkasynyń Vena qalasyndaǵy halyqaralyq uıymdar janyndaǵy Turaqty ókildigi tarapynan daıyndalǵan ekspozıtsııa qonaqtardy bas qalanyń arhıtektýralyq, mádenı jáne sport obektilerimen qatar, Astanada ótken iri jáne mańyzdy halyqaralyq is-sharalarymen tanystyrdy. Oǵan qosa, Astana mereıtoıyna oraı QR Syrtqy ister mınıstrligi daıyndaǵan qalanyń qalyptasýy men damýy týraly «Astana - beıbitshilik qalasy» atty arnaıy vıdeotaspa kórsetildi.
 

Fotokórmege EQYU Bas hatshysy Tomas Gremınger, Turaqty Ókilder, Uıymǵa qatysýshy-memleketter men yntymaqtastyq boıynsha seriktes memleketterdiń ókilderi jáne EQYU atqarýshy qurylymdyq bólimsheleriniń qyzmetkerleri, sondaı-aq genderlik qarjylandyrý boıynsha oqý semınaryna qatysý maqsatynda Aýstrııaǵa is-saparmen kelgen delegatsııa músheleri, onyń ishinde Qazaqstan Respýblıkasy Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraıymynyń orynbasarlary Elena Tarasenko men Lıazzat Súleımen de kórmeniń ashylýyna qatysty.

Atalǵan fotokórme Astana mereıtoıyn atap ótý sheńberindegi Aýstrııadaǵy merekelik jobalar leginiń biri boldy.

Sol kúni EQYU Turaqty Keńes otyrysy barysynda Astanadaǵy EQYU Baǵdarlamalar ofısiniń basshysy Derd Sabo «Qazaqstan 2050 strategııasy», «Bes ınstıtýtsıonaldyq reformany júzege asyrý jónindegi Ult jospary - 100 naqty qadam», sondaı-aq Qazaqstan Prezıdenti Nursultan Nazarbaevtyń Qazaqstan halqyna «Qazaqstannyń úshinshi jańǵyrýy: jahandyq básekege qabilettilik» jáne «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» joldaýlarynda alǵa qoıǵan maqsattardy júzege asyrýǵa qolǵabys kórsetetinin jáne EQYU ókildigi óz jumysyn soǵan qaraı negizdegenin habarlady.

D.Sabo EQYU Baǵdarlamalar ofısiniń 2017 jyldyń shildesinen bastap 2018 jyldyń maýsymyna deıin Qazaqstannyń birsypyra qalalary men óńirlerinde qaýipsizdik, ekonomıka, ekologııa jáne adam quqyqtary men bostandyqtary ispettes salalarda is-sharalar ótkizgenin aıtty.

Turaqty Keńes otyrysy barysynda Qazaqstan Turaqty Ókili qarymta baıandamasynda EQYU ókildiginiń jumysyna oń baǵa berip, baǵdarlamalyq jobalardyń sanynan buryn sapasyna nazar aýdarýǵa shaqyrdy. Sondaı-aq, EQYU ókildiginiń jumysyn zaman talabyna saı ári EQYU Astana Sammıti barysynda alǵa qoıylǵan maqsattardy júzege asyrýdyń mańyzdylyǵyn atap ótti.