Astananyń 20 jyldyǵyna oraı Jambyl oblysynda 20 nysan beriledi
Oblys ákimdiginiń baspasóz qyzmetinen málim etkendeı, atalmysh aktsııaǵa ún qosqan Baızaq aýdanynda mereke qarsańynda sý jańa bóbekjaı esigin ashpaq. Aýdan ortalyǵy - Sarykemer aýylynda ornalasqan «Erik ata» balabaqshasynyń qurylysyna 11 mıllıon teńge jumsalǵan. Jospar boıynsha munda 3 topta 75 bala mektepke deıingi tárbıemen qamtylady.
Balalarǵa arnalǵan nysan Jambyl aýdanynda da paıdalanýǵa beriledi. Aqbulym aýylynda boı kótergen balabaqsha «Zerde» ataýyn alǵan. Munda 2 topta 50 bala oqytylady. Olarǵa qazaq tilinde bilim beriledi. Munda 6 oqytýshy jumyspen qamtylǵan.
Elorda toıy qarsańynda ashylatyn kelesi nysan Jýaly aýdanyndaǵy «Burnoye Solar-2» JShS-niń kún elektr stansysy. «Burnoye Solar-1» stansasynyń 2-shi kezeńgi kesheniniń qurylysyna 22 mıllıard 667 mıllıon teńge qarajat jumsalǵan. Onyń 7 mıllıard 804 mıllıon teńgesi United Green-Samruk Kazyna JShS-niń menshikti qarjysy bolsa, qalǵan 17 mıllıard 580 mıllıon teńge Eýropa qaıta qurý jáne damý banki men Taza tehnologııalar qorynan alynǵan. Qýattylyǵy 50 MVt-ty quraıtyn balamaly qýat kózin óndirý nysanyn salý jumystaryna 300 adam tartylǵan. Al nysan iske qosylǵan soń onda 45 adam jumysqa ornalasady dep kútilýde.
Al Merki aýdanynda «Ersultan» jekemenshik balabaqshasy el ıgiligine tapsyrylmaq. 125 búldirshindi mektepke deıingi tárbıemen qamtıtyn mekemede 4 top jumys isteıtin bolady. Balaqaılar 3 tilde bilim almaq. Qazirgi tańda, balabaqshaǵa 104 bala jınalǵan.
Elordanyń mereıtoıy qarsańynda eń úlken syıǵa qordaılyqtar ıe bolmaq. Óıtkeni, Qasyq aýyldyq okrýginiń ózinde 7 nysan iske qosylady.
Atap aıtqanda, munda Áljan ana aýylynyń tarıhı mýzeıi paıdalanýǵa beriledi. Onda aýyl tarıhyna qatysty barlyq derekter qory jınastyrylǵan.
Sondaı-aq, Áljan ana aýylynda dárigerlik ambýlatorııa esigin ashady. 15 kelýshige shaqtalǵan nysannyń qurylysyna 35 mıllıon teńge jumsalǵan. Munda 9 medıtsına qyzmetkeri aýyl azamattarynyń densaýlyǵyn saqtaý baǵytynda qyzmet etetin bolady.
Aýdanda buqaralyq sportty damytýǵa da basa nazar aýdarylyp otyr. Osyǵan oraı, Áljan ana aýylynda sport alańshasy paıdalanýǵa beriledi. Oblystyq bıýdjetten bólingen 8 mıllıon 756 myń teńgege salynǵan nysannyń qurylysyn «Al-Arkarjan ı K» JShS-i júrgizgen.
Sondaı-aq, Qordaı aýylynda 320 kórermendi syıdyra alatyn dene shynyqtyrý-saýyqtyrý kesheni ashylady. Atalmysh nysannyń qurylysy oblystyq bıýdjettiń qarjylandyrýy arqyly 2017 jyldyń naýryz aıynda bastalǵan. Bas merdiger «PSK Alıbek» JShS bólingen 420 mıllıon 867,8 myń teńgeniń 200 mıllıon teńgesin byltyr ıgergen. Al 231 mıllıon 713 myń teńgeni bıyl paıdalanylǵan.
Mereke qarsańynda, sonymen qatar, «Qasyq» kooperatıvi de óz jumysyn bastamaq. Quramynda 33 múshesi bar aýylsharýashylyǵy birlestigi jyldyń basynan óz qarajattaryna iri qara mal satyp alyp bordaqylap, «Pervomaıskıe delıkatesy» JShS-ne kelisim shart arqyly 32 tonnadan astam et ótkizgen.
Budan bólek, aktsııa aıasynda qordaılyqtardyń paıdalanýyna qos birdeı balabaqsha beriledi. Onyń biri - Qordaı aýylyndaǵy «Kerimbala» balabaqshasy. 200 baldyrǵanǵa shaqtalǵan nysanda memlekettik jáne resmı tilderde bilim beriledi. Balalar baqshasynyń qurylysyna 150 mıllıon teńge jumsalǵan. Al «Asyl perzent» balabaqshasyn salýǵa 40 mıllıon teńge bólingen. Munda 4 topta 100 bala tárbıelenedi. Baldyrǵandar qazaq tilinde bilim alady.
Astananyń 20 jyldyǵy qarsańynda Sarysý aýdanynda sý jańa óndiris oshaǵy jumysyn bastaıdy. «Solıanaıa kompanııa «Asyl tuz» JShS-niń as tuzyn óndiretin zaýyty aýdan ortalyǵy Jańatas qalasynda oryn tepken. Atalmysh joba Jambyl oblysy ákimdiginiń 2016 jyly 30 jeltoqsandaǵy №369 qaýlysy negizinde óńirlik kásipkerlikti qoldaý kartasyna engizilgen. Kásiporyn qurylysyna 710 mıllıon teńge qarastyrylǵan. Zaýyt jylyna 50 myń tonna tuz shyǵarýǵa qaýqarly. Jospar boıynsha munda 75 adam jumyspen qamtylady. Olardyń ortasha jalaqysy 60-80 myń teńgeni quramaq.
Elorda mereıtoıy qarsańynda T. Rysqulov aýdanynyń ortalyǵy Qulan aýylynda 160 kórermenge arnalǵan dene shynyqtyrý-saýyqtyrý kesheni esigin ashady. Nysan qurylysyna 362,8 mıllıon teńge bólingen. Merdiger «Nur Tursyn» JShS keshen qurylysyn ótken jyldyń naýrysynda bastap, merekege oraı ýaqtyly aıaqtap otyr.
Al Talas aýdany Qarataý qalasynyń turǵyndary Astananyń mereıtoıyn jańa páterlerinde toılaıdy. Óıtkeni, aýdan ortalyǵynda aktsııa aıasynda 70 páterli kópqabatty turǵyn úı paıdalanýǵa beriledi. Shaǵyn shahardyń 5-shi shaǵyn aýdanynda ornalasqan №51 úıdiń jóndeý jumystaryna 226 mıllıon 886 myń teńge bólingen.
Sonymen birge, Qarataý qalasynda «Eldana» balabaqshasy paıdalanýǵa beriledi. 50 balaǵa arnalǵan nysannyń jobalyq quny 20 mıllıon teńgeni quraıdy. Qazaq tilinde oqytý júrgiziletin mektepke deıingi bilim berý mekemesinde balalardyń tolyqqandy bilim alýy úshin bar jaǵdaı jasalǵan.
Astananyń 20 jyldyǵan oraı Shý aýdanynyń ortalyǵy Tóle bı aýylynda «Nur-Ash» jáne «Lashyn» balabaqshalary jumysyn bastamaq. 41,5 mıllıon teńgege salynǵan «Nur-Ash» balabaqshasy 75 baldyrǵandy qabyldaýǵa shaqtalǵan. Munda búldirshinde qazaq jáne orys tilderinde oqytylady. Al «Lashynnyń» qurylysyna 7 mıllıon teńge bólingen. Munda da 75 baldyrǵan 3 topqa bólinip oqytylady.
Bas qalanyń mereıtoıyna oraı Taraz qalasynda da birqatar nysandar iske qosylmaq. Atap aıtsaq, kóne shaharda «Kókjıek-2030» JShS-niń sút ónimderin óndiretin zaýytynda jańa tseh ashylady. Tseh jalpy quny 1,6 mıllıard teńgeni quraıtyn ıtalııalyq zamanaýı qondyrǵylarmen jabdyqtalǵan. Ol táýligine 100 tonna sútti óńdep, ónim alýǵa múmkindik beredi. Nátıjesinde, qosymsha 30 adamdy jumyspen qamtylmaq.
Sonymen qatar, oblys ortalyǵynda qurylysyna 494,7 mıllıon teńge bólingen oblystyq olımpııadalyq rezerv arnaıy mektebiniń 3 angarlyq sport zaly paıdalanýǵa beriledi. Ótken jyldyń naýryz aıynda bastalǵan qurylys jumystaryn «Qarataý qurylys-2030» JShS-i júrgizgen. Nysan jobasyn «Taraz-Tehnoproekt» kompanııasy jasaǵan.
Al osy kúni tapsyrylatyn oblystyq arnaıy balalar-jasóspirimder №4 sport mektebindegi velosıped bazasynyń qurylysyn «AEM» JShS-i júrgizip shyqqan. Bul nysannyń da qurylysy 2017 jyly bastalǵan. Mereke qarsańynda máresine jetken jumystarǵa 166,5 mıllıon teńge jumsalǵan.