Astananyń 20-jyldyǵyna oraı Orynbordan kólik kerýeni jolǵa shyqty
Orynbordan jol tartqan «Qutty meken Aqtóbeden-Astanaǵa» atty kólik kerýeni aldymen Orynbordan Aqtóbege kelip, ary qaraı Qyzylorda, Almaty qalalary arqyly Astanaǵa barmaq. Kólik kerýeni elordaǵa Astana kúni qarsańynda jetetin bolady.
Jobany Aqtóbe oblysy usynyp otyr. Ondaǵy maqsat - Qazaqstannyń osy kúngi jetistikterin kórsetý, tarıhı astanalardyń tarıhı-mádenı, ǵylym, bilim salasyndaǵy, sonymen qatar iskerlik ortalyqtarynyń ımıdjin tanytý, Aqtóbe oblysy men Orynbor oblysynyń arasyndaǵy jastardyń mádenı baılanysyn jáne dostyǵyn nyǵaıtý.
«Kólik kerýeniniń alǵashqy astanadan jol tartýy - zańdy. Ary qaraı eldiń burynǵy astanalary - Qyzylorda, Almatyǵa barmaq, sońǵy aıaldama - qazirgi elordamyz Astana qalasy», - dedi Aqtóbe oblysynyń ákimi Berdikbek Saparbaev Aqtóbe jáne Orynbor oblystarynyń resmı delegatsııalarynyń kezdesýinde.
Kólik kerýeniniń quramyna mádenıet jáne óner qaıratkerleri, qoǵamdyq uıymdardyń ókilderi, ǵalymdar, sportshylar, dárigerler men jastar kirdi.
Jol júrý barysynda kólik kerýeni 17 eldi mekenge toqtaıdy. Onda alýan túrli sporttyq sharalar ótkizip, merekelik kontsertter beredi. Aýyl turǵyndaryna medıtsınalyq kómek kórsetilip, sheberlik sabaqtary ótkizilmek.