Astananyń 20 jyldyǵy: «SAMGAU» teatr festıvaliniń Gran-prı ıegeri 2 mln teńge alady
Sharanyń ashylýyna Astana qalasy ákiminiń orynbasary Ermek Amanshaev qatysty. Apta boıy 16 maýsymǵa deıin qalalyq teatrlardyń sahnalarynda Qazaqstannyń óńirlerinen jáne taıaý shetelden ákelingen úzdik qoıylymdar kórermenderdiń nazaryna usynylatyn bolady.
Bıyl festıvaldiń ataýy da, mazmuny da ózgeshe. Buryn ol «Sahnadan sálem» dep atalyp kelgen edi. Bul týraly «Jastar» teatrynda elordada teatr aptalyǵynyń ashylýyna arnalǵan baspasóz máslıhatynda teatr jáne kıno rejısseri, dramatýrg, Qazaqstannyń halyq ártisi Talǵat Temenov aıtty.
- Alty jyl buryn Qýanyshbaev atyndaǵy qazaq teatrynyń irgesinde osy festıvaldiń tusaýy kesilgen bolatyn. Ol kezde ony halyqaralyq deńgeıge jetedi dep eshkim de oılamaǵan. Bıyl sharanyń ataýyn ǵana emes, sondaı-aq mazmunyn da ózgertip otyrmyz. Biz nomınatsııalar belgilep, qatysýshylardy materıaldyq turǵydan qoldaý týraly sheshim qabyldadyq. Festıvaldiń bas júldesi - 2 mıllıon teńge, - dedi T. Temenov.
Onyń aıtýynsha, «SAMGAU» festıvaline qatysýǵa 53 ujym ótinim bergen, onyń ishinen tek 12-si ǵana tańdalǵan.
- Búginde teatr ónerine suranys joǵary. Eger 5 jyl buryn teatr álemi turalap tursa, sońǵy 3-4 jylda aıtarlyqtaı serpin jasaldy. Jańa sapaly qoıylymdar kóp, sondyqtan irikteý qatań boldy. Ázirge ýaqyttyń tyǵyzdyǵynan qatysýshylardy kóbirek ala almaımyz. Qazylar alqasy kúnine 3 spektaklden kóredi. Óıtkeni festıval bir aptaǵa ǵana sozylady, - dedi ol.
Sonymen qatar, belgili professorlar, teatr óneriniń sańlaqtary kún saıyn festıval qatysýshylaryna vokal, sahnada qozǵalý jáne sóıleý, akterlik sheberlik boıynsha sheberlik dárisin ótkizetin bolady.
- Elordada turǵan soń teatrymyzǵa akterlerge úıretý úshin vokal boıynsha pedagogty nemese baletmeısterdi shaqyra alamyz. Al, mysaly, oblystyq teatrlarda ondaı múmkindik joq. Sondyqtan biz teatrlarǵa búginde tanymal jańa qoıylymdardy tamashalaý jáne sheberlerimizden sabaq alý úshin akterlerin jibersin dep shaqyrý jiberdik. Olarǵa sertıfıkattar beriledi, - dedi akter, rejısser jáne professor Nurqanat Jaqypbaı.
Bıylǵy festıvaldiń taǵy da bir ereksheligi - oǵan OFF-baǵdarlama retinde Qazaq ulttyq óner ýnıversıtetiniń akterlik óner jáne rejıssýra kafedrasynyń stýdentteriniń dıplomdyq spektaklderi de qatysady.
- Bul tájirıbeni keler jyly da jalǵastyrmaqpyz. Bul biz úshin jaqsy. Jańa daryndarmen tanysamyz. Sebebi festıval aıasynda teatrlardyń kórkemdik jetekshileri men dırektorlary kóp bolady. Olar birlesip jumys isteý úshin jas talantty akterler men rejısserlerdi tańdaı alady, - dep túsindirdi Talǵat Temenov.
Baspasóz maslıhatyna qatysýshylar bıylǵy festıvaldiń ózgeshelikteri týraly aıtqan soń orkestr mýzykasynyń súıemeldeýimen dástúr boıynsha qyzyl kilemniń ústimen júrip ótti. Eń aldymen festıvaldiń qazylar alqasy kórindi.
Aıta keteıik, onyń quramyna úzdik otandyq, sonymen qatar Reseı men Qyrǵyzstannyń teatr synshylary endi. Atap aıtqanda, Esengeldi Tuıaqov, Elena Mıtchenkova, Janysh Qulmambetov, Sánııa Qabdıeva, Erkin Jýasbek, Murat Ábzelbaev, Gúldana Saparǵalıeva, Nazerke Jumabaı.
Olardan keıin qyzyl kilemmen «SAMGAU» festıvaline qatysýshylar: Astana, Petropavl, Shymkent, Óskemen qalalary teatrlarynyń trýppalary, sondaı-aq Serbııa, Tatarstan, Qyrǵyzstan jáne Ózbekstannan kelgen qonaqtar júrip ótti.
Ádettegideı, sherý «Jastar» teatrynyń sahnasynda kontserttik baǵdarlamamen jáne festıvaldiń ashylý saltanatymen jalǵasty. Jınalǵan qaýym elordalyq akterlerdiń ónerin tamashalady. Baǵdarlamany festıvaldiń alǵashqy kórsetilimi - «Jastar» teatrynyń Nurqanat Jaqypbaı qoıǵan «Revızor» tragıfarsy jalǵastyrdy.