Astananyń 20 jyldyǵy: Respýblıkalyq radıomúsháıra ótedi
Radıomúsháıra Astananyń 20 jyldyǵyna arnalyp otyr. Onyń maqsaty - Astananyń álem men el aldyndaǵy mańyzyn, alar ornyn, damý satylaryn óleńge arqaý ete otyryp, Elbasynyń eńbegin kórsetý. Sol arqyly eldi, jerdi, Otandy qurmetteýdiń úlgisin óskeleń urpaqtyń sanasyna sińirý.
«Radıomúsháıra memlekettik tilde ótedi. Músháıraǵa qatysatyn aqyn «Eńseli elordam» jáne «Eltutqa - Elbasy» degen taqyrypty qamtıtyn eki óleń joldaýy kerek. Ár óleńniń kólemi 10 shýmaqtan aspaýy tıis. Radıomúsháıraǵa 18 ben 35 jas arasyndaǵy aqyndar qatysady. Músháıraǵa usynylǵan jyr marjanyn saraptaý úshin táýelsiz qazylar alqasy jasaqtalady. Іrikteýden ótken óleńder Qazaq radıosynyń efırinen oqylady», - dep habarlandy mınıstrliktiń baspasóz qyzmetinen.
Respýblıkalyq radıomúsháıra arnaıy habar retinde radıo efırine qoıylady. Naqtyraq aıtqanda, jıiligi aptasyna bir ret, uzaqtyǵy 10 mınýtqa sozylmaq.
Radıomúsháıraǵa qatysatyn aqyndar óleńderin radio.mushaira@gmail.com elektrondy poshtasyna jiberýi tıis. Esh jerde jarııalanbaǵan óleńder 2018 jylǵy 16 sáýir men 16 mamyr aralyǵynda qabyldanady. Músháıranyń qorytyndysy Astana kúni qarsańynda jarııalanady. Úzdik dep tanylǵan óleńder arnaıy jınaqqa enedi. Sonymen qatar úzdik óleńder aýdıodıskige jazylady. Eń úzdik 5 aqynnyń óleńine «Qazaqstan» ulttyq arnasy beınesıýjet túsirip, efırden beredi.
Radıomúsháıra qorytyndysy boıynsha jeńimpazdarǵa qarjylaı júlde, sertıfıkat, dıplom beriledi. Atap aıtqanda, І orynǵa (1 júldeger) 500 myń teńge, ІІ orynǵa (2 júldeger) 300 myń teńgeden, ІІІ orynǵa (2 júldeger) 200 myń teńgeden tabystalady. Músháıranyń qorytyndy poezııa keshi «Qazaqstan» Ortalyq kontsert zalynda ótedi.