Astananyń 20 jyldyǵy: Mereke kúnderi qaıda barýǵa bolady
2-3 shilde kúnderi elorda turǵyndary men qonaqtary ІІ Halyqaralyq «Quralaı» qýyrshaq teatry festıvali aıasynda Túrkııa, Reseı, Estonııa, Polsha, Týnıs, Belgııa elderiniń jáne astanalyq qýyrshaq teatrynyń qoıylymdaryn tamashalaı alady. Spektaklder elordanyń qýyrshaq teatrynda sahnalanady.
2 shilde kúni Q. Qýanyshbaev atyndaǵy memlekettik akademııalyq qazaq mýzykalyq drama teatrynda jas aqyndar Qazaqstannyń elordasyn jyrǵa qosady. «El tiregi - Elorda» músháırasy saǵat 17:00-de bastalady dep kútilýde.
Dál osy kúni saǵat 19:00-de «Báıterek» monýmentiniń mańynda amerıkandyq ACIDIC tobynyń kontserti ótedi.
3-5 shildede qalalyqtar «Serper» VІ respýblıkalyq qazaq halyq aspaptar orkestri festıvaliniń qonaǵy bola alady. Túrli orkestr ujymdary Esil ózeniniń jaǵasyndaǵy amfıteatrda, «Stýdenttik», «Astanalyq» saıabaqtarynda óner kórsetedi.
Ázilsúıer qaýymdy 4 shildede saǵat 19:00-de Nomad city holynda ótetin «Nazar aýdar» teatrynyń ázil-syqaq baǵdarlamasy kútedi.
Al «Jastar» saraıynyń jazǵy sahnasynda 5-6 shildede karaokeden qalalyq ashyq chempıonatta Astana qalasy ákiminiń Kýbogi úshin saıysqa túsýge bolady. Saıys saǵat 15:00-de bastalady.
Bul kúnderi qalalyq alańda kóshe bıinen halyqaralyq «International Street dance Session in Astana» festıvali ótedi dep josparlanǵan.
6 shildede saǵat 17:00-de Esil ózeni jaǵasyndaǵy amfıteatrda qala turǵyndary men qonaqtarynyń aldynda vengrııalyq «Kurazsi» etno-bı ansambli óner kórsetpek.
Al saǵat 18:00-de «Astana» kontsert zalynda KSRO Halyq ártisi, Qazaqstannyń eńbek sińirgen ártisi, KSRO jáne Qazaqstan memlekettik syılyǵynyń ıegeri, Sotsıalıstik Eńbek Eri Bıbigúl Tólegenovanyń jeke kontserti uıymdastyrylady.
Osy ýaqytta «Jastar» saraıynyń jazǵy sahnasynda elordalyq «Moıa lıýbımaıa Astana» foto baıqaýynyń jeńimpazdary marapattalady.
Merekelik kontsertter, sondaı-aq Esil ózeniniń jaǵasynda, «Qazaq eli» monýmentiniń mańynda, «Báıterek» alańynda ótedi.
7 shildede qalalyq alańda ıtalııalyq «FORWARD» djaz kvartetiniń kontsertin jáne «Energııa mýzykı» kontsertin tamashalaýǵa bolady.
Mádenı aptany qazaqstandyq estrada juldyzdarynyń qatysýymen ótetin «Kesh jaryq, Astana!» kontserti aıaqtaıdy. Ol Esil ózeniniń jaǵasynda 8 shildede ótedi. Bastalýy saǵat 20:00-de.
Budan bólek, 2-8 shilde aralyǵynda elordanyń saıabaqtary men sport keshenderinde sporttyń ár alýan túrinen jarystar uıymdastyrylady. Olardyń arasynda báıge túrinen ótetin «Astana kýbogi» de bar.