Astananyń 20 jyldyǵy: Alpınıster men BAQ ókilderi 20 shyńdy baǵyndyrady
Bul týraly «Qazaq Týrızm» UK basqarma tóraǵasy Rashıd Kúzembaev QR Úkimetiniń baspasóz ortalyǵynda málim etti.
«Astananyń 20 jyldyǵyna birneshe joba josparlanǵan. Solardyń biri - Qazaqstannyń 20 taý shyńyna ekspedıtsııa attandyrý. Belgili qazaqstandyq Maqsut Jumaev, Baǵlan Júnisov, Artem Skopın sekildi alpıpnıster, BAQ ókilderi men blogerler qatysady. Olar Altaı taýlary, Tıan-Shan, Jońǵar Alataýy, Ógem jotasy, Ortalyq Tıan-Shan taýlaryna shyǵady», - dedi ol QR Úkimetiniń baspasóz ortalyǵynda «Qazaqstannyń sakraldy geografııasy» jobasyn iske asyrý týraly brıfıngte.
Ulttyq kompanııa basshysynyń aıtýynsha, ekspedıtsııa kelesi aıda bastalady jáne eki shyńǵa kóterilýde alpınıada uıymdastyrylady. Alpınızm festıvaline myńdaǵan adam qatysady dep josparlanǵan.
Odan bólek, tanymal saıahatshylar men BAQ ókilderi, blogerler úshin Qazaqstannyń 20 tabıǵı nysanyna 6 baǵyttan quralǵan ekspedıtsııa ázirlenip jatyr. Bul ekspedıtsııa qazaqstandyq týrıstik ónimdi ishki naryqta ilgeriletýge múmkindik beredi.
Sonymen birge, Rashıd Kúzembaev naýryz aıyndaǵy qytaılyq blogerlerge arnalǵan aqparattyq týr nátıjesi týraly aıtyp berdi.
«Qytaılyq blogerler saparynan keıin Qytaı ınternet jelisindegi Qazaqstan týraly jarııalanymdardyń qaralymy 35 mıllıonǵa jetti. Qazaqstannyń Qytaıdaǵy tanymaldyǵy artty. Reseılik blogerlerdiń de bir toby kelip-ketti, ekinshi toby kúzge qaraı keledi», - dep óz sózin túıindedi R. Kúzembaev.