Astananyń 10 krımınaldy aýlasy anyqtaldy

ASTANA. QazAqparat - Astanada qylmystyq quqyq buzýshylyqtar jıi oryn alatyn 10 qylmystyq aýla anyqtaldy jáne olarǵa 262 beınekamera ornatylady. Sondaı-aq qaýipsizdikpen qamtamasyz etý maqsatynda jeke kúzet uıymdary shaqyrylady.

 Bul týraly QR Bas prokýratýrasy Quqyqtyq statıstıka jáne arnaıy esep basqarmasynyń basshysy Rýslan Álkenev Astanada ótken baspasóz máslıhatynda málimdedi, dep habarlaıdy QazAqparat elordanyń Info saıtyna silteme jasap.

«Astana boıynsha qylmys jıi jasalatyn 10 aýlany anyqtadyq. Olardyń barlyǵy Saryarqa aýdanynda, vokzal mańynda ornalasqan.  Onda 262 beınekamera  ornatyp kórmekpiz. Dabyl ákimdiktiń jaǵdaıattyq ortalyǵyna kelip túsedi jáne kúzet fırmalaryndaǵy operatorlarǵa jiberiledi. Operatorlar qylmys jasalǵan orynǵa jedel topty jiberedi», - dedi Rýslan Álkenev. 

Onyń aıtýynsha, atalǵan aýlalarda urlyq, qoǵamdyq tártipti buzý jáne ákimshilik quqyq buzýshylyqtar jıi tirkelgen.

Jergilikti polıtsııa páter ıeleri kooperatıvimen birlesip, turǵyndar arasynda túsindirme jumystaryn júrgizedi jáne turǵyndar kelisim berse, kúzet fırmalarymen shart bekitiledi.

«Aýla turǵyndaryn kúzet kásiporyndarymen kelisimshart bekitýge shaqyramyz. Komıtet ákimdikpen birlesip, tegin kameralardy qoldaný múmkindigin berip otyr, al turǵyndar kúzet kásiporyndarynyń qyzmei úshin aqy tóleýi tıis», - dep túsindirdi spıker.

Qyzmet quny páter sanyna baılanysty bolmaq. Sondaı-aq, ol elordanyń kóptegen aýlalarynda beınekameralardyń bar ekenin, oǵan turǵyndardyń aı saıyn 300-400 myń teńge tóleıtinin, biraq kameralardy eshkim baqylamaıtynyn, jaǵdaıattyq ortalyqqa dabyl túspeıtinin atap ótti.

«Quqyq buzýshylardy beınekamera toqtata almaıdy. Qylmys jasalǵanda ǵana, zardap shegýshi vıdeony izdeı bastaıdy. Biz bul protsesti basqasha uıymdastyrǵymyz keledi. Kúzet fırmasynyń qyzmetkeri aýlany baqylap, sezikti jaǵdaı týǵanda jedel topty jiberip, qylmystyń aldyn alýy kerek», - deıdi R.Álkenev.

Ustalǵan buzaqylardy kúzet kásiporyndarynyń qyzmetkerleri quqyq qorǵaý organdaryna tabystaıtyn bolady.

Sondaı-aq, QR Bas prokýratýrasy Quqyqtyq statıstıka jáne arnaıy esep basqarmasynyń basshysy qylmys jıi jasalatyn 10 aýlany atap kórsetti:

 №1 aýla - Gete kóshesi, №10 jáne 1/1 úıler, Birjan sal kóshesi, №10 úı, Qutpanov kóshesi, №4 úı. Jyl basynan beri munda 41 qylmystyq quqyq buzýshylyq oryn alǵan.

№2 aýla - Gete kóshesi №4 úı, 4a. Jyl basynan beri 33 qylmystyq quqyq buzýshylyq bolǵan.

№3 aýla - Bógenbaı batyr dańǵyly №59, Sh. Aımanov kóshesi -16, 16/1, Dúkenuly kóshesi №28/1 úı. Jyl basynan beri 30 qylmystyq quqyq buzýshylyq bolǵan.

№4 aýla - «Mahabbat» TK, Saryarqa dańǵyly №41,43, Máskeý kóshesi №20. Jyl basynan beri 57 qylmystyq quqyq buzýshylyq tirkelgen.

№5 aýla - «Leıa» TK, Potanın kóshesi №3 jáne №3/1 úıler. Jyl basynan beri 26 qylmystyq quqyq buzýshylyq oryn alǵan.

№6 aýla - Sh.Qosshyǵululy kóshesi № 7 jáne №7/1 úıler. 29 qylmystyq quqyq buzýshylyq tirkelgen.

№7 aýla - Sh.Qosshyǵululy kóshesi №14  jáne 187 kóshe №14/3, 14/4, 16/3, 16/4 úıler. 32 qylmystyq quqyq buzýshylyq tirkelgen.

№8 aýla - Sh.Qosshyǵululy kóshesi №20 úı. Jyl basynan beri 21 qylmystyq quqyq buzýshylyq bolǵan.

№9 aýla - ýl. Sh. Aımanov kóshesi №9, 11, 20, 20/1 úıler. Munda 31 qylmystyq quqyq buzýshylyq tirkelgen.

№10 aýla - Y. Dúkenuly kóshesi, №38 úı. Jyl basynan beri 21 qylmystyq quqyq buzýshylyq oryn alǵan.