«Astanany qaıda aýystyramyz» degen kezde Elbasyna 17 usynys túsken edi – Mırbolat Jaqypovtyń esteligi
Mırbolat Jaqypov qazir memlekettik bank mekemeleri jáne qoǵamdyq qyzmet kórsetý qyzmetkerleriniń sapalyq kásipodaǵynyń tóraǵasy. «Antikor LIVE» jobasynda qazirgi jas býyn bile bermeıtin qyzyqty áńgimelerdi aıtyp berdi.
«Buryn Astana kúnin 10 maýsymda toılaıtyn edik. Elordamyzdyń birinshi jyldyǵyn dál sol kúni atap ótkenimiz esimde. Kún salqyn boldy, jańbyr jaýyp turdy. Almatydan kelgen biz ábden tońyp qalǵanbyz. Arqadaǵy aýa-raıyna sol tusta beıimdele bastadyq. Jalpy Astana kúniniń 6 shildege aýysýynyń birneshe sebebi bar. Joǵarǵy keńes eń alǵashqy resmı sheshimdi 1994 jyly 6 shildede qabyldaǵan bolatyn. Tarıhtan biletinderińizdeı, bul sheshim óte qıyn ótti. Ábish Kekilbaev aǵamyzdyń esteliginen oqyp kórseńiz kózińiz jetedi. 6 shilde Elbasynyń týǵan kúni bolǵannan keıin depýtattardyń kóbi «syılyq jasaıyq» dep daýys berip, sheshim qabyldanǵan», - dep eske alady ótken ýaqytty Mırbolat Jaqypov.
Jalpy sol kezde memlekettik apparattyń Almatydan Nur-Sultanǵa kóshýi «óte kóp ári qyzyqty áńgime» deıdi ol.
«Kezinde osy úlken sharýaǵa aralastym. Jumystarǵa jaýapty da boldym. Eldiń astanasyn Almatydan kóshirý úshin úlken memlekettik komıssııa quryldy. Tájirıbeli basshylar bul aýqymdy sharýanyń basy-qasynda júrdi. Osynyń arqasynda úsh jyldyń ishinde úlken daıyndyq jumystary júrgizilip, kóship keldik. Biraq kóshkenge deıin birqatar máseleni retteý kerek boldy. Ol kezde Aqmolaǵa astanany kóshirý isine birtalaı jurt qarsy edi. 1994 jyly el áli daǵdarystan shyqpaǵan kezeń. Inflıatsııa 2265 paıyzǵa ketti. Aılyǵymyz ortasha eseppen 24 dollar bolatyn. Halqymyzdyń 35 paıyzy ol kezde kedeı ómir súrdi. Qıyn kezeń. Biraq soǵan qaramastan Elbasy jigerli sheshim qabyldady», - dedi ol.
Mırbolat Jaqypov astanany Aqmolaǵa kóshirý bastamasyna jurtshylyq qarsy bolmaǵanymen, memlekettik apparattyń ishinde bul sheshimge kóńili tolmaǵandar bolǵanyn aıtady.
«Premer-mınıstrdiń ózi qarsy boldy. Ol tusta Úkimet basshysy Ákejan Qajygeldın myrza edi. Bir mysal keltire keteıin: Prezıdent bir Jarlyqqa qol qoıar aldynda qolbelgiler jınaımyz. Sol vızalardyń birin Prezıdent maǵan «Úkimet basshysyna óziń kirip, vızasyn alyp shyq» dep tapsyrdy. Ol Jarlyq astanany kóshirý týraly sharýalardyń bir bóligi edi. Úkimet basshysy «qoımaımyn» dedi. «Sizdiń vızańyz bolmaı ketpeımin» dep otyryp aldym. «Qalaı sonda? Qoımaımyn» dep otyryp aldy. «Joq, siz qoıǵansha otyramyn» dedim. Jarty saǵat júrdi, turdy, otyrdy, terezege baryp qarady. «Áli otyrsyń ba?» dedi. Aqyry urysty, burqyldady, biraq qoıyp berdi. Sondaı jaǵdaılar bolǵan», - deıdi ol.
Mırbolat Jaqypov ol tusta Alataýdan Arqaǵa qonys aýdaratyn memlekettik qyzmetkerlerdiń 25 paıyzyn iriktep alý týraly tapsyrma bolǵanyn eske alady. Eń tájirıbeli mamandardy irikteý mindeti turdy.
«Memlekettik qyzmetkerlerdi iriktep aldyq. Eskerttik. Qalǵandarǵa Almatyda jumys taýyp berýge tyrystyq. Álbette munyń bári psıhologııalyq turǵyda ońaı tımeıtin jumys boldy. Jańa astanaǵa barǵysy kelmegender de bar edi. Biraq maman retinde olar bizge kerek bolatyn. Tipti keıbir memlekettik qyzmetshilerdiń jubaılaryna deıin úgittep, balalaryńyzdy oılańyzdar dep sóılestik. Jastar qalasy dedik», - dedi ol.
Almatyda ol tusta halyq kóp bolyp ketken eken. 2000 jyldarǵa jetpeı halyq sany mıllıonnan asyp ketken. Kóshedegi keptelister sol kezdiń ózinde bar.
«Almaty elimizdiń eń shetinde, bir buryshynda ǵana tur. Basqa oblystarǵa alys. Geosaıası jaǵynan da astanany Arqaǵa kóshirý tıimdi boldy. Astanany qaı jerge aýystyramyz degen kezde nusqalar kóp boldy. Mamandardan 17 usynys keldi. Elbasy kóp oılandy. 17 nusqa barlyq parametr boıynsha taldandy. Aınalyp kelip sheshim Aqmolaǵa toqtaldy», - deıdi ol.
Mırbolat Jaqypov qazirgi Nur-Sultannyń Aqmola óńirinde boı kóterýiniń tarıhyn jastar bilmeýi múmkin ekenin atap ótti.
«Kez kelgen elde «qosymsha astana» bolady. Máselen Sovet odaǵynyń qosymsha astanasy – Kýıbyshev, qazirgi Samar qalasy. Al Qazaqstannyń qosymsha astanasy – Aqmola boldy. Ony kóbi bilmeıdi. Sebebi kezinde qupııa boldy. Qazir aıtýǵa bolady. Jańadan 32 parametr boıynsha Saryarqanyń tórinde osylaısha astanamyz boı kóterdi», - dedi ol.
Foto: gbstu.kz