Astanany gazdandyrýǵa brıtandyqtar qyzyǵýshylyq tanytýda - Qaırat Ábdirahmanov

ASTANA. QazAqparat - Brıtandyq ınvestorlar Astana gaz qubyryn tartý qurylysyna qyzyǵýshylyq tanytyp otyr. Bul jaıynda  QazAqparat QR Syrtqy ister mınıstri Qaırat Ábdirahmanovqa silteme jasap habarlaıdy.

«Syrtqy ister mınıstrligi birqatar ındýstrııalyq ortalyq pen elordany gazben jabdyqtaýǵa qosatyn jańa gaz qubyry jobasyna ınvestıtsııa tartýǵa kómektesetin bolady. Qazirgi ýaqytta brıtandyq ınvestorlardan naqty usynys bar», - dep jazady mınıstr «Kazahstanskaıa pravda» gazetiniń búgingi nómirinde jaryq kórgen baǵdarlamalyq maqalasynda.

Qaırat Ábdirahmanovtyń atap ótýinshe, Qazaqstanda ınfraqurylymdyq jobalardyń basty kúrdeliligi jer shalǵaılyǵymen baılanysty. Sondyqtan olar naqty tehnıkalyq esepteýler men halyqaralyq teń qarjylandyrýdy qajet etedi. 

Sonymen qatar onyń aıtýynsha, mýnıtsıpaldy, ónerkásiptik jáne jeke sektorlardy gazǵa kóshirý energııa tıimdiligin arttyrýǵa jáne klımat ózgerýiniń turaqtylyǵyn qamtamasyz etýge septigin tıgizedi. Bul Qazaqstannyń birqatar halyqaralyq qarjy ınstıtýttarymen yntymaqtastyǵynyń basymdyǵy sanalady.

«Astana, Qaraǵandy, Temirtaý jáne Jezqazǵan qalalarynyń turǵyndary Memleket basshysynyń bastamasyn zor qýanyshpen qabyldaǵanyna senimim mol», - dep atap ótedi Syrtqy ister mınıstri.

5 naýryzda Qazaqstan Prezıdenti Nursultan Nazarbaev «Prezıdenttiń bes áleýmettik bastamasy» atty halyqqa úndeýin jarııa etti. Besinshi bastama eldi gazben qamtamasyz etýdi jalǵastyrýdy kózdeıdi. Atap aıtqanda Qaraózek (Qyzylorda oblysy) - Jezqazǵan-Qaraǵandy-Temirtaý-Astana baǵytynda magıstraldi gaz qubyryn salý jobasyn júzege asyrýdy qarastyrady.