Astanany gazdandyrý merzimderi qandaı

ASTANA. QazAqparat - «Astana qalasyn gazdandyrý» boıynsha memlekettik saraptama júrgizý úshin tehnıkalyq-ekonomıkalyq negizdeme jasalyp, ázirlendi. Onyń nátıjesi «Memsaraptama» Respýblıkalyq memlekettik kásipornyna jiberildi, dep habarlaıdy QazAqparat elorda ákimdiginiń resmı saıtyna silteme jasap. 

Qorytyndyny alýdyń boljamdy merzimi - 2018 jyldyń tórtinshi toqsany.  Astana qalasynda gaz taratý jelileriniń qurylysy tehnıkalyq-ekonomıkalyq negizdemege sáıkes úsh kezekke bólingen. 

Gazdandyrý protsesin jedeldetý úshin qazirgi ýaqytta tehnıkalyq-ekonomıkalyq negizdememen bir mezgilde 9 iske qosý keshenin qamtıtyn jobanyń 1-kezeginiń jobalyq-smetalyq qujattamasy ázirlenýde:

1-shi iske qosý kesheni - gaz berý 1-Avtomatty gaz taratý stansasynan (AGTS) JEO-1 jáne JEO-3-ke jetkiziledi (sý jylytqysh qazandyqtar jáne mazýt qazandary);

2-shi iske qosý kesheni - gaz AGTS-2-den JEO-2-ge beriledi (sý jylytqysh qazandar);

Úshinshiden 6-ynshy iske qosý keshenderi - gaz taratý jelileri Kóktal-1, Kóktal-2 turǵyn úı alaptaryna deıin tartylady;

7-shi keshendi iske qosý - gaz taratý jelisi Jeleznodorojnyı turǵyn alabyna jetedi;

8-shi jáne 9-shy keshenderdi iske qosý - gaz taratý jelisi «Ońtústik Shyǵys» turǵyn alabyna deıin tartylady.

Gazdandyrýdyń 1-kezeńiniń jobalyq-smetalyq qujattamasyn alýdyń boljamdy merzimi - 2019 jyl birinshi toqsany.

«1-kezektiń jobalyq-smetalyq qujattamasyna memlekettik saraptamanyń oń sheshimin alǵan soń, ákimdik QR Bıýdjet kodeksine sáıkes Energetıka mınıstrligine jobany qarjylandyrý úshin qajetti qujattamany baǵyttaıtyn bolady. 2021 jáne 2023 jyldar aralyǵyndaǵy 2-shi jáne 3-shi kezektegi gaz taratý jelileriniń qurylysyn jergilikti bıýdjet, respýblıkalyq bıýdjet, sondaı-aq jeke ınvestıtsııalar esebinen júzege asyrý josparlanǵan», - delingen ákimdik aqparatynda.

Jobanyń ekinshi kezegin iske asyrý aıasynda gaz taratý jelilerin Mıchýrıno, Internatsıonalnyı, Kúıgenjar, Telman, Prıgorodnyı, Garden Village jáne Family Village turǵyn alaptaryna jetkizý josparlanǵan.

Eske salaıyq, Elbasy «Bes áleýmettik bastamasynda» eldi gazben qamtamasyz etýdi jalǵastyrýdy tapsyrdy. Qaraózek (Qyzylorda oblysy)-Jezqazǵan-Qaraǵandy-Temirtaý-Astana baǵytynda magıstraldi gaz qubyryn salý jobasy júzege asyrylady. Elordany gazǵa kóshirý zııandy qaldyqtardyń aýaǵa taralýyn 6 esege nemese jylyna 35 myń tonnaǵa azaıtady.

«Astanaenergoservıs» AQ Astana qalasyn gazdandyrý baǵdarlamasynyń jobasyn qoǵamdyq talqylaýǵa shyǵarǵanyn buǵan deıin habarlaǵan bolatynbyz.