Astanany gazdandyrý qalanyń shetki aýdandarynan bastalady
Jobaǵa saı birinshi kezekte kógildir otynmen qalalyq JEO, Kóktal-1, Kóktal-2, Temirjol turǵyn alaptary men Ońtústik-shyǵys aýdany qamtylady.
Qalalyq Otyn-energetıkalyq keshen jáne kommýnaldyq sharýashylyq basqarmasynyń málimetinshe, Astanany gazdandyrý jobasy 3 kezekten turady. Birinshi kezek aıasynda gaz AGTS-1-den JEO-1 jáne JEO-3-ke, AGTS-2-den JEO-2-ge, gaz taratýshy jelilerden Kóktal-1, Kóktal-2, Temirjol turǵyn alaptaryna jáne Ońtústik-shyǵys aýdanyna taratylady.
Jobanyń ekinshi kezeńi otyndy gaz taratýshy jelilerden Mıchýrıno, Internatsıonalnyı, Kúıgenjar, Telman, Prıgorodnyı, Garden Village, Family Village turǵyn alaptaryna jetkizýdi qarastyrady.
Úshinshi kezekte Ilınka, Shubar, Óndiris turǵyn alaptary gazdandyrylatyn bolady. Osy jyldyń ІІ toqsanynda І kezektegi gaz taratý jelileriniń qurylysy bastalady dep josparlanýda. Qarjylandyrýdyń bólinýine qaraı Kóktal-1,2, Temirjol jáne Ońtústik-Shyǵys turǵyn úı alaptary 2019-2023 jyldar aralyǵynda gazdandyrylmaq.
Astanany gazdandyrý respýblıkalyq jáne jergilikti bıýdjet, sondaı-aq jeke ınvestıtsııalar qarajaty esebinen júzege asyrylǵaly otyr. Qalany gazdandyrý sheńberinde Astana ákimdiginiń quzyretine gaz taratý jelileriniń qurylysy kiredi.