Astanany damytý isinde birizdilik bolmaǵan soń, orynsyz qurylys kóbeıip ketti - Toqaev

ASTANA. QazAqparat – Memleket basshysy Qasym-Jomart Toqaev elordany damytý máseleleri jóninde keńes barysynda turǵyn úı máselesin sheshýdi qalany damytýdaǵy eń mańyzdy úshinshi problema retinde atap ótti, dep habarlaıdy QazAqparat.

«ÚShІNShІ. Turǵyn úı qurylysyn retke keltirý qajet. Qazirgi tańda Astanada 10 mıllıon sharshy metrge jýyq turǵyn úı salynyp jatyr. Ókinishke qaraı, qurylys qarqyny joǵary bolǵanymen, sapaǵa kóńil bóline bermeıdi. Bul salada olqylyqtar óte kóp. Qalany kórkeıtip, jurtqa qolaıly jaǵdaı jasaý basty nazarda bolýǵa tıis. Alaıda, jekelegen qurylys kompanııalarynyń múddesi basym túsip jatady. Qalany damytý isinde birizdilik bolmaǵan soń, orynsyz qurylys kóbeıip ketti. Áleýmettik nysandar men qoǵamdyq oryndar bolýǵa tıis jerlerde turǵyn úı keshenderi salyndy. Qurylys – ekonomıkanyń óte mańyzdy salasy. Buǵan daý joq. Astanada qurylys kóp bolǵandyqtan, qomaqty qarjy bólinetini belgili. Sondyqtan, adal kásipkerlermen qatar, túrli alaıaqtar da paıda kórip qalýǵa tyrysady. Keıbir kompanııalar qurylys júrgizýge ruqsat beretin qujattary bolmasa da, jumys istep jatyr. Bıznesti tekserýge salynǵan tyıymdy, ıaǵnı moratorııdi jeleý etedi»,-dedi Memleket basshysy.

Sondaı-aq ol sózinde úleskerlerden zańsyz qarajat jınalatynyn atap ótti. Bul – óte qaýipti úrdis. Ákimdik quqyq qorǵaý organdarymen birlesip, bul úrdiske tosqaýyl qoıýy kerek. Munyń bári jańa problemalyq nysandardyń paıda bolýyna ákep soqtyrady. Ákimdik kóz jumyp otyra berse, bul másele ýshyǵyp ketedi.

«Sheneýnikterdiń mundaı salǵyrttyǵy jáne jaýapsyzdyǵy ulttyq qaýipsizdikke nuqsan keltirýi múmkin. Sondyqtan, barlyq salada, sonyń ishinde qurylys salasynda zań men tártip bolýǵa tıis. Men zańsyz qurylysqa jol bermeý úshin baqylaýdy kúsheıtip, salany retteýdi tapsyrdym»,-dedi Qasym-Jomart Toqaev.

Osyǵan deıin ol elordany sýmen qamtamasyz etý máselesin kótergenin jazdyq.