Astananyń ınklıýzıvti teatry «Taza Qazaqstan» spektaklin qoıdy
«Taza Qazaqstan nemese ormanda shyrsha týdy» spektakli «Teremok» ertegisiniń jelisimen sahnalandy. Bul – tabıǵat pen adam qarym-qatynasy týraly kóńildi ári tárbıelik máni bar oqıǵa. Kórermender de spektakl qatysýshylaryna aınalyp, ózderin akter rólinde synap kóre alady.
«Biz respýblıkalyq «Taza Qazaqstan» aktsııasyna qatysqymyz keldi, – deıdi balalar ortalyǵynyń dırektory jáne teatr jetekshisi Alýa Barmanqulova, – sondyqtan qorshaǵan orta men ekologııa taqyrybynda spektakl jasap shyǵardyq. Bizdiń teatrdyń barlyq qoıylymdary bilim berý men tárbıelik messedjderdi qamtıdy. Munda da bas keıipkerdiń qıyn jaǵdaıǵa tap bolyp, keıin damý jolyna túsip, óz qatelikterin túsinip, túzetkeni týraly baıandaımyz».
«Taza Qazaqstan» spektakli jazda kórsetilgen bolatyn, biraq bul joly, jetekshiniń aıtýynsha, stsenarıı qaıta jazylyp, ertegilik sıpatpen jáne shyrshamen jańajyldyq kóńil-kúı qosylǵan.
Balalar kóleńkeli teatry 2024 jyldyń maýsym aıynda Astanadaǵy Professor 4-6 balalar ortalyǵynda ashyldy. Otbasylyq teatrdyń 30 adamǵa deıin syıatyn shaǵyn zaly bar, onda balalar men ata-analardyń ózara qarym-qatynasy erekshe oryn alady.
«Teatrdy ashpas buryn, biz aýtızm jáne erekshe qajettilikteri bar balalardyń ata-analarymen keńestik. Teatrymyzdyń barshaǵa qoljetimdi bola alatynyn túsiný úshin olardyń pikirin bildik, – dep bólisti Alýa Barmanqulova. – Olardyń qoldaýyn alyp, teatr ataýyna «ınklıýzıvti» sózin qostyq. Bizdiń kórermenderimizdiń arasynda erekshe álemi bar balalar boldy. Sondaı-aq, teatr qonaqtary arasynda bizdiń elde týǵan sheteldik balalardy da kórýge bolady».
Búgingi tańda teatr repertýarynda qazaq jáne orys tilderinde úsh turaqty spektakl bar.
«Bizdiń teatrdyń ereksheligi – biz ertegilerdi qaıta óńdep, olarǵa ulttyq kolorıt qosyp, ınteraktıvti elementter engizip, múlde jańa týyndy jasaımyz. Mýzyka, jaryq jáne kóleńkeler qııaldy damytyp, kórermenderdi keıipkerlermen birge ýaıymdaýǵa yqpal etedi. Kórermenderimizdiń 99%-y úshin kóleńkeli spektakl – túbegeıli jańa tájirıbe», - deıdi teatr basshysy.