Astananyń ár aýdany Naýryz naqyshtarymen árlenedi
Ortalyq kommýnıkatsııalar qyzmetinde ótken brıfıngide Astana qalasy mádenıet basqarma basshysynyń orynbasary Nuran Kamzın Naýryzdy toılaý josparymen bólisti.
Onyń aıtýynsha, «EHRO» halyqaralyq kórme ortalyǵynda otandyq jáne sheteldik qolónershilerdiń qatysýymen «Kóshpeli órkenıet» festıvali ótedi. Búginde merekeleý tujyrymdamasy ázirlenip, sahnalyq alańdar daıyndalyp jatyr.
«21-22 naýryz 11:00-den 16:00-ge deıin elordamyzdyń Ortalyq alańynda, «Qazaq eli» monýmenti, «Báıterek» monýmentiniń janyndaǵy alańda, elordalyq saıabaq pen EXPO alańynyń aýmaǵynda qazaqstandyq estrada juldyzdarynyń qatysýymen negizgi merekelik kontsertter ótkizý josparlanyp otyr. Sonymen qatar, qalanyń 5 aýdanynda 30-dan astam merekelik kontsert ótedi. 21-22 naýryz kúnderi saǵat 12:00-den bastap aýdan Almaty aýdanynyń 12 turǵyn úı alabynda jáne Baıqońyr aýdanynda 8 turǵyn alabynda, Saryarqa aýdanynyń 4 alańynda, Esil aýdanynda 4 alań, sonymen qatar Nura aýdanynda 4 alańda merekelik sharalar ótedi», - dedi spıker.
14 naýryzda saǵat 19:00-de Erkeǵalı Rahmadıev atyndaǵy Memlekettik akademııalyq fılarmonııasynyń Kameralyq hory «Tal besikten – Jer besikke…» atty teatrlandyrylǵan qoıylymyn usynady. Іs-shara «Astana Opera» teatrynyń Kúlásh Báıseıitova atyndaǵy kameralyq zalynda ótedi. Bul is-shara – qazaqtyń dástúrli ádet-ǵuryptaryna negizdelgen hor qoıylymy. 15 naýryz kúni saǵat 19:00-de Erkeǵalı Rahmadıev atyndaǵy Memlekettik akademııalyq fılarmonııasynda «Naýryz aıy týǵanda» merekelik teatrlandyrylǵan kontsert josparlanǵan.
«Ulttyq qundylyqtarymyzdy nasıhattap, el ishinde keńinen taratyp, dáripteý maqsatymen ótetin merekelik baǵdarlamada – besik jyrynan bastap salt-dástúr ánderi, halyqtyq jáne Qazaqstan kompozıtorlarynyń ulttyq naqyshtaǵy ánderi, ulttyq bıleri oryndalady», - dedi Nuran Kamzın.
17 naýryzda «Báıterek» monýmentiniń alańynda ulttyq kıim kıgen jastardyń neke qııý saltanaty ótkiziledi. Al, aqsaqaldar men kópbalaly analar «Naýryz bata» beredi dep josparlanǵan. 19 naýryz kúni saǵat 16:00-de Beıbitshilik jáne kelisim saraıynda «Naýryz ulttyq syılyǵynyń» marapattaý rásimi ótedi. Ulttyq óner men dástúrdi nasıhattaýǵa arnalǵan «Naýryz» Ulttyq syılyǵy bıyl 9 atalym boıynsha tabystalady. 20 naýryzda «Arǵymaq» sport kesheninde ulttyq sport túrlerinen jarys uıymdastyrylmaq.
«21-24 jáne 29-31 naýryz aralyǵynda Qýyrshaq teatrynda «Naýryz-Dýman» qýyrshaqtar shoýy ótedi. Sondaı-aq 14 naýryz Kórisi kúni – Amal merekesinen bastaý alyp árbir kúnniń taqyryptyq is-sharalarmen tolyqtyrylady. Naýryz meıramyn merekeleý aıasynda barlyq alańda kıiz úıler tigilip, altybaqandar ornatylady. Sonymen qatar ulttyq sport oıyndary ótkiziledi», - dep habarlady Astana qalasy mádenıet basqarma basshysynyń orynbasary.