Astanany aınala qoıylǵan polıtsııa beketteri qashan jumysyn toqtatady
«Astanada Shanhaı yntymaqtastyq uıymynyń sammıtin ótkizý kezeńinde qoǵamdyq tártip pen qaýipsizdikti qamtamasyz etý, sondaı-aq quqyq buzýdyń aldyn alý jáne jolyn kesý maqsatynda polıtsııanyń jeke quramy qyzmet ótkerýdiń kúsheıtilgen tártibine aýystyrylǵan. Qalaǵa kireberiste «Rýbej» polıtsııasynyń statsıonarlyq beketteri jumys istedi, onda qujattar tekserilip, avtokólikterde tyıym salynǵan zattardyń bar-joǵy tekserildi», - delingen QR Іshki ister mınıstrligi baspasóz qyzmetiniń Kazinform agenttigine bergen jaýabynda.
Bul beketter jumysyn qyrkúıek aıynyń ortasyna deıin jalǵastyratyny belgili boldy.
«Qazirgi kezde beketter V Dúnıejúzilik kóshpendiler oıyndaryna daıyndyq kezeńinde jáne olar aıaqtalǵanǵa deıin jumys isteıdi. Sonymen qatar, azamattardyń qalaǵa kirýi men shyǵýy boıynsha qandaı da bir shekteýler qarastyrylmaǵan», - dep atalyp ótken vedomstvo aqparatynda.
Eske salsaq, ShYU sammıti 3-4 shildede ótti. Osyǵan oraı, terrorıstik qaýiptiń «sary» deńgeıi engizilip, álemge belgili tájirıbege sáıkes ýákiletti memlekettik organdar elge keletin sheteldik delegatsııalardyń, olardyń ishinde memleket basshylary men halyqaralyq uıymdar basshylarynyń qaýipsizdigin joǵary deńgeıde qamtamasyz etýge tolyqqandy sharalar qabyldady.
Al V Dúnıejúzilik kóshpendiler oıyndary Astanada 8-13 qyrkúıek kúnderi ótedi. Jarysqa álemniń 89 elinen 2 myńnan astam sportshy qatysady. Astana sammıtine Shanhaı yntymaqtastyq uıymyna múshe elderden kelgen meımandar men BAQ ókilderine elordada ótkeli otyrǵan V Dúnıejúzilik kóshpendiler oıyndary tanystyrylǵan bolatyn.