Astanalyqtyń shaǵymynan keıin «Olx.kz» saıtyna monıtorıng júrgizildi

ASTANA. QazAqparat - «Olx.kz» saıtynda jalǵan habarlandyrýlardyń kóptep jarııalanatynyn alǵa tartqan astanalyq turǵynnyń shaǵymyna baılanysty atalǵan ınternet-resýrske tekseris júrgizildi, dep habarlaıdy QazAqparat tilshisi.

Aıta ketsek, «Ashyq dıalog» portalyndaǵy QR Aqparat jáne kommýnıkatsııalar mınıstri Dáýren Abaevtyń blogyna elorda turǵyny Roza Pogorelova jazyp, «Olx.kz» saıtyndaǵy jalǵan habarlandyrýlarǵa shaǵyndanǵan.

«Olx.kz» saıtynda ózin «Amır» agenttigi dep tanystyrǵan agenttik júıeli túrde asa kóp mólsherde, bir ǵana eseptik jazbamen esimderi men mekenjaılaryn ózgerte otyryp, jalǵan habarlandyrýlardy taratady. Ol habarlamalardaǵy foto shynaıy emes, barlyq habarlandyrýda - jalǵan aqparat, shynaıy ómirde salynbaǵan múliktik nysandar», - dep jazǵan Roza Pogorelova.

Onyń aıtýynsha, habarlandyrýdy ornalastyrý aqyly bolǵandyqtan (bir habarlandyrý úshin 150 teńgeden joǵary) Olx.kz saıtynyń ákimshiligi aqparattyń ras-ótirigin teksermeıdi, adamdardyń myńdaǵan aryz-ótinishterine qulaq aspaıdy.

«Atalǵan saıt arqyly adamdardy aldaý júrip jatyr. Astana qalasyndaǵy bul bassyzdyqty toqtatýdy ótinemin», - degen áıel.

Atalǵan ótinishke baılanysty jaýap bergen Dáýren Abaev «Olx.kz» ınternet-resýrsyna QR BAQ týraly zańnamasynyń talaptaryna saı quqyqtyq monıtorıng júrgizilgenin habarlady.

«Monıtorıng barysynda buzýshylyqtar anyqtalǵan joq. Jarmanalyq baǵyt pen habarlandyrýlardyń kóp bolýyna baılanysty buzýshylyqtyń tirkelgenin dáleldeı alatyndaı, jarnamalyq materıaldar men ekrandyq keskinderge naqty siltemelerdiń bolǵany jón», - dedi vedomstvo basshysy.

Mınıstrdiń aıtýynsha, buqaralyq aqparat quraldaryn nemese aqparattyq-kommýnıkatsııalyq jelilerdi paıdalana otyryp, jalǵan aqparat taratatyndar QR Qylmystyq kodeksiniń 274-baby 2-bóligi 3-tarmaqshasyna sáıkes qylmystyq jaýapkershilikke tartylady.

«Qylmystyq quqyqbuzýshylyq isteri boıynsha QR Qylmystyq kodeksiniń 274-baby qarastyrylǵan Qazaqstan Respýblıkasynyń Qylmystyq-protsessýaldyq kodeksine sáıkes, aldyn ala tergeý jumystaryn ishki ister organdarynyń tergeýshileri júrgizedi. Osyǵan baılanysty quqyqty, erkindikti nemese zańdy múddeni qorǵaý úshin Qazaqstan Respýblıkasynyń zańnamasynda bekitilgendeı quqyq qorǵaý organdaryna ótinish berýge keńes beremiz», - dep jaýap berdi ol.