Astanalyqtardyń 72 paıyzy koronavırýsqa qarsy vaktsına aldy

NUR-SULTAN. QazAqparat – Elorda jurtynyń 72 paıyzy KVI-ge qarsy ekpe saldyrdy. Jáne medıtsına mamandary astanalyqtardan úıde ózdiginen emdelýge bolmaıtynyn eskertti, dep habarlaıdy QazAqparat tilshisi.

«Birinshiden, úıde, ózdiginen emdelýge keńes bermeımiz. Sebebi durys emdelmeýdiń arty aýrýdyń asqynýyna alyp kelýi múmkin. Sondyqtan patsıent aldymen oqshaýlanǵany jón, sosyn jedel járdem nemese mobıldi brıgadany shaqyrǵany abzal. Sodan soń mamandar tıisti tekserý júrgizip, qajet jaǵdaıda PTR testin alady. Jáne tekserý nátıjesine saı emdeý ádis-tásilin usynady», - dedi Nur-Sultan qalasy qoǵamdyq densaýlyq saqtaý basqarmasy basshysynyń orynbasary Álııa Rústemova ákimdikte onlaın ótken baspasóz máslıhatynda.

Densaýlyq saqtaý basqarmasy ókiliniń aıtýynsha, búginde elordada 448 myńnan astam adam koronavırýsqa qarsy vaktsına aldy.

«Biz astanalyqtardyń vaktsına alý jaǵdaıyna taldaý jasadyq. Oǵan sáıkes 27 myńǵa jýyq elorda turǵyny vaktsınany basqa óńirden alǵan. Bastysy olar ujymdyq ımmýnıtettiń qalyptasýyna úlesin qosyp jatyr. Bizdegi derekterge sáıkes, astanalyqtardyń 72 paıyzy koronavırýsqa qarsy vaktsına alǵan», - deıdi ol.

Buǵan deıin basqarma basshysynyń orynbasary koronavırýs júkti áıelder men balalar arasynda jıileı túskenin aıtqan edi.