Astanalyqtar úshin áleýmettik tólemaqynyń kólemin arttyrý usynyldy
Áleýmettik muqtaj jandarǵa beriletin tólemaqy kólemin arttyrý bastamasyn Nur-Sultan qalasy jumyspen qamtý jáne áleýmettik qorǵaý basqarmasy basshysynyń mindetin atqarýshy Ilıa Skýb kóterdi.
«Qurmetti depýtattar sizderdiń nazarlaryńyzǵa Astana qalasy máslıhatynyń 2017 jylǵy 12 jeltoqsandaǵy № 221/25-VI sheshimine sáıkes qabyldanǵan áleýmettik kómek kórsetý, onyń mólsherlerin belgileý jáne muqtaj jandardyń jekelegen sanattarynyń tizbesin aıqyndaý týraly qaǵıdaǵa ózgeris engizý usynylady. Jańa qaǵıdaǵa sáıkes muqtaj jandarǵa áleýmettik kómek kólemin 90 AEK-ten (aılyq eseptik kórsetkish) 130 AEK-ke deıin kóbeıtý usynylyp otyr. Ol úshin bıýdjetten qosymsha 18, 4 mln teńge qajet», - dedi Ilıa Skýb elorda máslıhatynyń otyrysynda.
Sondaı-aq, basqarma basshysynyń mindetin atqarýshy depýtattardan atalǵan bastamany qoldaýyn surady.
«Ótken jyly atalǵan áleýmettik kómek elordada 163 adamǵa kórsetildi. Jumsalǵan soma 42,7 mln teńge. Bıyl jyl bastalǵaly áleýmettik kómekke muqtaj jandardan 73 ótinim kelip tústi. Onyń ishinde 51 jannyń ótinishi boıynsha áleýmettik tólem jasaldy. Ol úshin 13,7 mln teńge bólindi. Qalǵan 23 ótinim qaralyp jatyr. Byltyr jalpy sany 200 astanalyq otbasy qamtyldy. Bıyl kórsetiletin áleýmettik kómekti 200-250 otbasyǵa deıin ósirý josparlanyp otyr. Kómekke muqtaj jandardyń sany artqan jaǵdaıda qosymsha bıýdjetten qarjy qarastyratyn bolamyz», - deıdi ol.