Astanalyqtar «Mýzeı túnin» merekeleýdi bastap ketti

NUR-SULTAN. QazAqparat – Elordada halyqaralyq mýzeı túni atalyp ótýde, dep habarlaıdy QazAqparat tilshisi.

Bıyl dástúrli, mádenı-tanymdyq shara «Mýzeı qudireti» atty taqyrypta ótip jatyr.

Qala turǵyndary men qonaqtary saǵat 18:00-den bastap, túngi 00:00-ge deıin Ulttyq mýzeı jádigerlerin tegin tamashalaı alady.

Sonymen qatar halyqaralyq «Mýzeı túni» aıasynda túrli mádenı-tanymdyq sharalar uıymdastyrylǵan.

Atalǵan sharanyń maqsaty – mádenı qundylyqtardy, halqymyzdyń tarıhyn, mádenıetin bir keńistikke biriktire otyryp, ártúrli janr men stıldegi óner týyndylaryn kópshilik nazaryna usyný.

«Búgingi shara aıasynda erekshe mazmunda úsh birdeı kórme ashylady. Ol - otandyq sýretshilerdiń týyndylary, mýzeı qorynyń kartografııalyq kórmesi jáne qolóner sheberleriniń eńbekteri. «Mýzeı túni» túngi saǵat 00:00-ge deıin jalǵasady. Sonymen qatar balalarǵa arnalǵan tanymdyq shara uıymdastyrylady. Mýzeı qyzmetkerleri balalarǵa arnalǵan oıyndar men vıktorınalyq saıystar ótkizedi. Qundy jádigerlerdi qalpyna keltirý protsesi kórsetiledi», - dedi QR Ulttyq mýzeıi dırektorynyń orynbasary Abaı Satybaldın.

Aıta keteıik, búgin - halyqaralyq mýzeı túni. Osyǵan oraı álem elderinde aıtýly mereke keń kólemde atalyp ótiledi.

Eske sala ketsek, pandemııaǵa baılanysty sońǵy eki jyl boıy «Mýzeı túni» sharasy onlaın formatta ótti.