Astanalyqtar medqyzmetkerlerdiń dórekiligi men óz jumysyn bilmeıtinine jıi shaǵymdanady

NUR-SULTAN. QazAqparat – Mindetti áleýmettik medıtsınalyq saqtandyrý júıesi aıasynda kórsetiletin qyzmetter men onyń sapasyna túrli shaǵym kelip túsedi. Sonyń ishinde medıtsına qyzmetkerleriniń dóreki sóıleýi men jumysyn bilmeýine de qatysty da shaǵymdar bar. Bul týraly mindetti áleýmettik medıtsınalyq saqtandyrý qorynyń Nur-Sultan qalasy boıynsha fılıalynyń dırektory Nurlybek Qabdyqaparov málim etti, dep habarlaıdy QazAqparat tilshisi.

«Turǵyndar kóbine konsýltatıvtik-dıagnostıkalyq qyzmetterdiń jetimsizdigine, qural-jabdyqtyń bolmaýy, kezekti uzaq kútý, joldama bermeý jáne kadr jetispeýshiligi boıynsha shaǵym túsirip jatady. Sondaı-aq, medıtsına qyzmetkerleriniń dóreki sóıleýi men qyzmetin bilmeýine de qatysty shaǵymdar bar. Odan bólek, medıtsınalyq qyzmet sapasy men qyzmetterdi uzaq kútý boıynsha aryz túsip jatady. Jalpy alǵanda shaǵymdardyń deni turǵyndarǵa medıtsınalyq kómek kórsetýdi durys uıymdastyrýǵa qatysty. Atalǵan máseleler sol jerde, ıaǵnı qyzmet kórsetilgen medıtsınalyq uıymda sheshimin tabýy tıis», - dedi Nurlybek Qabdyqaparov ZOOM platformasynda ótken baspasóz máslıhatynda.

Onyń aıtýynsha, túsken búkil shaǵym boıynsha shara qabyldanyp, ótinish ıelerine jaýap beriledi.

«Ótinishter men shaǵymdardyń negizgi bóligi «1406» baılanys ortalyǵy men «Qoldau» 24/7 mobıldi qosymshasy arqyly túsedi. Ol ótinishter 3 deńgeıli óńdeýden ótedi. Turǵyndarmen turaqty keri baılanys bar», - deıdi ol.