Astanalyqtar kómirdi qaıdan satyp ala alady

NUR-SULTAN. QazAqparat - Nur-Sultanǵa jeke sektor turǵyndary úshin kómirdiń jetkilikti kólemi jetkizildi, dep habarlaıdy QazAqparat.

Qalalyq ákimdiktiń málimetinshe , qatty otynnyń qazirgi jalpy qory - 10 570 tonna.

«Elordaǵa 1 maýsym men 5 qazan aralyǵynda 1962 vagon, ıaǵnı 136 561 tonna kómir keldi. Onyń ishinde qyrkúıek aıynda – 44 vagon nemese 2967 tonna «Maıkúbi» kómiri, 6 vagon nemese 414 tonna «Qarajyra» kómiri» dep habarlady elordanyń otyn-energetıka kesheni jáne kommýnaldyq sharýashylyq basqarmasy.

Elordalyqtar qatty otyndy 11 núkteden ala alady, olar myna mekenjaılarda ornalasqan: Gertsen, 4/1, 40-st.; Gertsen, 6 B; Kóktal, 28/1; Jubanov, 35; Lıteınaıa, 44; Dýlatov, 182/1, Tsentr beton; Jabaev, 68; Maqat, 40.

Ortasha baǵa - kómir sortyna jáne jetkizý qyzmetin qospaǵanda 9500 teńgeden 13000 teńgege deıin. Sonymen, bir tonna «Shubarkól» kómiri 12750 teńgeden, «Qarajyra» – 12700, «Maıkúbi» – 13000, «Bogatyr» – 9500 teńgeden satylyp jatyr.

Qatty otyn baǵasy, túrleri men mólsheri týraly tolyq aqparatty 109 senim telefony arqyly alýǵa bolady.

Otyn aldyn ala satyp alynyp, qarańǵy jáne qurǵaq jerde saqtalsa, qasıetin joǵaltpaıdy. Basqarmanyń málimetinshe, qysta elordada orta eseppen 500 myń tonna kómir tutynylady.

Esterińizge sala keteıik, elordalyq tótenshe jaǵdaılar departamenti jeke sektor turǵyndaryn jylytý peshterin paıdalaný kezinde qaýipsizdik tehnıkasyn saqtaýǵa shaqyrady. Memlekettik organ kelesi erejelerdi saqtaýdy usynady:

- peshti 50h70 sm ólshemdi metall tósegishpen jabdyqtaý qajet;

- peshtiń janǵysh qurylymdardan órtke qarsy qashyqtyǵy keminde 26 sm bolýy kerek;

- tútin qubyrynyń ishki betinen qorǵalmaǵan janǵysh qurylystarǵa deıingi ara qashyqtyq 50 sm-den, al qorǵalǵan janǵysh qurylystarǵa deıin ara qashyqtyq 38 sm-den kem bolmaýy tıis;

- peshtiń qatty qyzýyna jol bermeý, peshterde jáne olarǵa jaqyn jerde otyn, kıim jáne basqa da janǵysh materıaldardy qurǵatpaý;

- pesh jaǵý úshin janǵysh suıyqtyqtardy paıdalanýǵa, janyp jatqan peshti qaraýsyz qaldyrýǵa, sondaı-aq olardy qadaǵalaýdy jas balalarǵa tapsyrýǵa;

- quramynda qyzǵan jáne byqsyǵan materıaldar bar kúl men qoj ottyqtan shyǵarylǵannan keıin órttiń paıda bolý múmkindigin boldyrmaıtyn jáne sýmen tógilmeıtin arnaıy bólingen orynǵa shyǵarylýy tıis.

Aıta ketý kerek, qalany gazdandyrý jumystary jalǵasýda. Turǵyn alaptarda úılerdi gazben jabdyqtaý jelilerine qosý úshin tegin tehnıkalyq sharttar alýǵa front-ofıster ashyldy.

Osy jylytý maýsymda Jeleznodorojnyı, Promyshlennyı, Kóktal-2, Kóktal-1, Agroqalashyq (ishinara) turǵyn aýdandaryndaǵy úıler gazben jylyta alady.

Sondaı-aq bıyl JEO-1 jáne JEO-2 qazandyqtarynyń bir bóligin gazǵa aýystyrý josparlanyp otyr.