Astanalyqtar kólik salyǵyn tólemeıtinder arasynda kósh bastady

ASTANA. QazAqparat - Kólik quraldarynyń salyǵy boıynsha qazaqstandyqtardyń jalpy qaryzynyń 13%-y astanalyqtarǵa tıesili, dep habarlaıdy QazAqparat tilshisi QR Qarjy mınıstrligi Memlekettik kirister komıtetine silteme jasap.

2018 jyldyń 1 qazanyndaǵy málimetterge sáıkes, kólik salyǵy boıynsha 734 myń qazaqstandyq qaryz. Jalpy qaryz somasy 18,9 mlrd teńge bolsa, onyń 13,9 mlrd teńgesi ǵana - negizgi qaryz, qalǵany ústeme ósim.

Sonymen birge, Memlekettik kirister komıteti keltirgen derekterge súıensek, 2,5 mlrd teńge qaryz Astanada turatyn 80 myń avtokólik ıelerine tıesili. Bul respýblıka boıynsha jalpy qaryzdyń 13 protsenti.

«Qaryz somasy boıynsha taldaý júrgizip kórdik. Másele, Astana boıynsha 86% astam boryshkerdiń qaryzy 50 myń teńgege jetpeıdi. 49% qaryzy - 1-10 myń teńge aralyǵynda. Bul aıtarlyqtaı kólemdi soma emes. 37% nemese 29 myń 800 boryshkerdiń qaryzy 10 myńnan 50 myń teńgege deıin jetedi. 100 myń teńgeden 1 mıllıon teńgege deıingi qaryz boryshkerlerdiń 5%-inde ǵana. 191 turǵyn 1 mıllıon teńgeden astam somaǵa qaryz. Bul - jalpy kólemniń 0,2% ǵana», - dedi QR Qarjy mınıstrligi Memlekettik kirister deparatmentiniń boryshtarmen jumys basqarmasynyń basshysy Aınur Kólshikova.   

Onyń aıtýynsha, Astanada salyq qaryzy týraly eskertýge arnalǵan reıd ótedi. Oǵan «Sergek» keshenderiniń múmkindikteri de qoldanylady.

«Boryshkerler týraly aqparat kásipkerlikti damytý jáne ınvestıtsııalar basqarmasyna jiberiledi, onda baza jasaqtalyp, Astana ІІD jol-patrýldik polıtsııasynyń planshetterine habarlanady», - dep túsindirdi A. Kólshikova.

Aıta keterligi, kólik quraldary jolda júrý erejesin buzǵanda ǵana toqtatylady.

Salyq qaryzy týraly eskertýdi tabystaǵan soń, 30 jumys kúni ishinde qaryz tólenbese, Memlekettik kirister organy sot oryndaýshylar arqyly qaryzdy óndirip alý úshin salyq buıryǵyn shyǵarady.