Astanalyqtar karantın talaptaryn qalaı buzady

NUR-SULTAN. QazAqparat - Elordada karantın talaptaryn buzǵandarǵa 134 mln teńge aıyppul salyndy. Bul týraly Nur-Sultan qalasy Baıqońyr aýdandyq taýarlar men kórsetiletin qyzmetterdiń sapasy men qaýipsizdigin baqylaý basqarmasy basshysynyń orynbasary Saltanat Yqylasova aıtty, dep habarlaıdy QazAqparat tilshisi.

«Elimizde karantın sharalary bastalǵannan beri aýqymdy jumys júrgizilip jatyr. Onyń biri - monıtorıngilik toppen qaladaǵy nysandardy tekserý. Top quramynda ákimdiktiń, sanıtarlyq-epıdemıologııalyq qyzmettiń ókilderi, polıtsııa qyzmetkerleri bar. Koronavırýs indetiniń órshýi múmkin degen boljamǵa baılanysty monıtorıngilik top saǵat 15.00 men 21.00 jáne 22.00 men tańǵy 04.00 aralyǵynda kúndelikti reıdke shyǵady», - dedi ol.

Onyń atap ótýinshe, osy ýaqytqa deıin qala aýmaǵyndaǵy nysandarda karantın talaptaryn buzý derekteri anyqtalyp otyr. Máselen polıtsııadan basqarma atyna 1160-qa jýyq baıanat kelip túsken. Sonyń negizinde zańdy, jeke tulǵalarǵa jáne laýazymdy qyzmetkerlerge 634 aıyppul salyndy. Aıyppul kólemi 134 mln teńgeden asyp jyǵylady. Búginde 535 aıyppul tólendi.

«Talap buzýshylyqqa keler bolsaq, nysanǵa kirgende kelýshilerdiń de, sonda jumys isteıtin qyzmetkerlerdiń de dene qyzýy ólshenbeıdi. Áleýmettik ara qashyqtyq saqtalmaıdy. Bir adamǵa 4 sharshy metr jumys orny bolýy tıistigi týraly talap ta oryndalmaıdy. Medıtsınalyq maska taǵý mádenıeti de tómen. Ǵımaratqa kirgen adam kúzetshiniń kózinshe maska taqqanymen, ǵımarat ishinde ony sheship tastaıdy. Maskany durys taqpaıdy. Mine, osyndaı jaıttar qynjyltady», - dedi Saltanat Yqylasova.