Astanalyqtar dárihanada tegin dári bermeı qoısa, qaıda júgine alady

ASTANA. QazAqparat – Astana qalasynyń qoǵamdyq densaýlyq saqtaý basqarmasy dári-dármekpen qamtamasyz etý bóliminiń basshysy Fatıma Smaǵulova turǵyndar dárihanada dári berýden bas tartsa, qaıda júgine alatynyn aıtty, dep habarlaıdy QazAqparat tilshisi.

«Ár jaǵdaıdy jeke qaraý kerek. Bálkim osy aıdyń dári-dármegi áli jetkizilmegen shyǵar. Degenmen dıstrıbıýterge qońyraý shalý arqyly jetkizýshini asyqtyrýǵa bolady. Osylaısha perparattysol kúni-aq alýǵa múmkindik bar. Eger emdelýshi emhanaǵa jańa ǵana tirkelgen bolsa, oǵan qajetti dári-dármek bolmaýy múmkin. Mundaı jaǵdaıda jańa tirkelgen emhana áleýmettik medıtsınalyq saqtandyrý qoryna ótinim túsirýi kerek. Ol ótinim «SQ-Farmatsııaǵa» joldanady. Ózge emhanalardyń qoımasynda suratylǵan dári bolsa, sony sizge baǵyttaý múmkindigi bar. Ótinim boıynsha suratylǵan dári-dármekti jóneltý birneshe kún alýy múmkin», - dedi bólim basshysy.

Sondaı-aq, ol ambýlatorııalyq dári-dármek boıynsha astanalyqtar «I-Komek» baılanys ortalyǵyna 109 nómiri arqyly júgine alatynyn aıtty.

«Tegin dári-dármektiń taratylýyn baqylap otyrý úshin «SQ-Farmatsııanyń» 1439 nómirinde baılanys ortalyǵy jumys isteıdi. Sol ortalyq halyqqa qajetti dáriniń qalaı jetkizilgeni, irkilister týraly málimetti tolyq jınaqtaıdy. Mindetti áleýmettik medıtsınalyq saqtandyrý máseleleri boıynsha 1406 nómirine de habarlasýǵa bolady. Búkil qońyraýlar tegin. Uıaly telefonnan da tegin qońyraý shalýǵa bolady», - dedi Fatıma Smaǵulova.