Astanalyqtar BI Group-tan zańǵa qaıshy bolsa da bergen ýádelerin oryndaýdy talap etip otyr
Aıta keterligi, «Arman qala» turǵyn úı kesheniniń qaq ortasynda ornalasqan Nazarbaev zııatkerlik mektebine balalaryn kólikpen ákelip-áketetin ata-analardyń sanynda shek joq. Saldarynan mekteptiń eki jaǵyndaǵy joldarda uzyn-sonar keptelister bolady. Sosyn keıbir kólik júrgizýshileri aýlalardyń arasymen qatty júrip, adam ómirine qaýip tóndiredi. Tipti keptelistiń saldarynan «Arman qala» turǵyndarynyń ózi aýlanyń ishinde qamalyp qalǵan eken. Sol sebepti turǵyndar «BI Group» kompanııasynan «ornatamyz» degen shlagbaýmdardy qoıýdy talap etip otyr.
Sonymen qatar, turǵyndardyń aıtýynsha, «BI Group» kompanııasy atalǵan qurylysqa jarnama jasaǵanda «Qaýipsiz aýla» bolady dep ýáde bergen. Atalǵan bastama aıasynda ata-analar aýlada oınaıtyn balalar úshin eshbir alańdamaýy tıis bolatyn. Sebebi árbir aýlanyń eki jaǵynda shlagbaým ornatylyp, turǵyndardyń qaýipsizdigine barynsha kóńil bólinedi degen jospar bolǵan. Degenmen, páterlerdi satyp alǵannan keıin turǵyndar «shlagbaýmdy ornatýǵa bolmaıdy» degen shekteýge tap boldy. «Ol qalaı? Osy úıdi satqan kezde bizge qaýipsiz aýla bolady dep jarnama jasaǵan. Shlagbaým bolady dedi. Endi, kelip, ruqsat joq deıdi. Olaı bolmaıdy! Sizder myna jerde tańerteń jáne keshke qaraı ne bolatynyn kelip kórińizder. Mekteptiń aınalasy mashınaǵa tolyp ketedi. Oqýshylardyń ata-analary asyǵyp júrip, aýlanyń ishimen júredi. Ótkende týra osy jerde bir balany qaǵyp ketti. Qaıta ol bala aman qaldy. Qazir biz óz balalarymyzdy dalaǵa shyǵarýǵa qorqatyn boldyq», - deıdi Shynar esimdi turǵyn.
Toqtala ketetin jaıt, áý basta BI Group joldaǵy jasandy kedergilerdi ornatyp kórgen. Alaıda jumysqa asyǵatyn kólik júrgizýshileri oǵan qaramaı, qatty jyldamdyqpen júıtkigennen keıin birneshe úıdiń aýlasyna shlagbaýmdardy ornatty. Degenmen, bulardy ázirshe iske qospaı otyr. Atalǵan tosqaýyldar mektepti aınalyp ótetin eki joldy jaýyp turǵan joq. «Endi, biz zań boıynsha jalpyǵa ortaq jerlerde tosqaýyldardy ornatýǵa bolmaıtynyn bilemiz. Sondyqtan tek balalar oınaıtyn aýlalardy ǵana eki jaqtan jaýyp otyrmyz. Úıdiń turǵyndary suraǵannan keıin ornattyq. Bul - turǵyndardyń ótinishi, olardyń qaýipsizdigi. Eń bastysy, Nazarbaev zııatkerlik mektebine baratyn eki joldy jaýyp jatqan joqpyz. Al shlagbaýmdar úshin jaýapkershilikti turǵyndar óz moıyndaryna aldy. Ol - jalpy jınalystyń sheshimi. Erteń tótenshe jaǵdaılar qyzmeti ol shlagbaýmdardy buzyp tastasa da, turǵyndar ózderi jaýap beredi», - deıdi «Arman qala» turǵyn úı keshenine qyzmet kórsetýshi kompanııa - «Astana Jılservıs» JShS («BI Group» qurylys kompanııasynyń enshiles kásiporny - avt.) menedjeri Aıjan Jańabaeva. Onyń aıtýynsha, tótenshe jaǵdaıda kezekshi santexnık shyǵyp, shlagbaýmdardy ashyp otyrady.
Aldaǵy ýaqytta «Arman qala» turǵyn úı kesheniniń turǵyndary Nazarbaev zııatkerlik mektebine jaqyn turǵan úılerdiń aýlalaryna da shlagbaým ornatý máselesin talqyǵa salmaq. Ol qurylǵylardy ornatqan jaǵdaıda oqýshylardyń ata-analary tek mektepke irgeles eki jolmen ǵana júre alady. Al árbir joldyń jıeginde jergilikti turǵyndardyń kóligi turǵanyn eskersek, barlyq shlagbaýmdardy ornatyp, iske qosqannan keıin Nazarbaev zııatkerlik mektebine bala alyp keletin kólik júrgizýshileri qatty qınalyp qalatyn syńaıly. Sebebi atalǵan mektep myńǵa jýyq oqýshyǵa arnalǵan.