Astanalyqtar áskerden oralǵan jas jaýyngerlerdi saltanatty túrde qarsy aldy
Poıyzdyń Almatydan Astanaǵa kelýiniń ózi de erekshe boldy. Perronda Qarýly kúshter men Aýǵan soǵysy ardagerleri, «Jas sarbaz» respýblıkalyq áskerı-patrıottyq qozǵalysynyń tárbıelenýshileri, sarbazdardyń ata-analary, týystary men dostary jınaldy.
«Osydan týra bir jyl buryn elordanyń osy temirjol vokzalynan 35-shi gvardııalyq desanttyq-shabýyldaý quramasynda qyzmet etýge qyryq sarbaz jiberdik. Qarýly kúshterdiń osyndaı myqty bólimshesinde shymyr jáne jan-jaqty jaqsy daıyndalǵan jastardy jınaımyz. Bul – olardyń keleshegine jaqsy joldama. Armııa mektebinen ótken adamnyń jumysqa ornalasýda da ózindik artyqshylyǵy barlyǵyna nyq senimdimin», - dep atap ótti Astana qalasy Qorǵanys isteri jónindegi departamenti bastyǵynyń orynbasary, maıor Artýr Qasqaraýov.
«Qarýly Kúshterdiń ardagerleri» RQB tóraǵasynyń orynbasary, general-maıor Marat Naǵumanov osyndaı uldar tárbıelegen sarbazdardyń ata-analaryna erekshe alǵysyn bildirdi.
«Biz Otan aldyndaǵy boryshyn ótegen jigitterdi qarsy aldyq. Áskerden qashatyndardaı emes, olar – óskeleńge urpaqqa úlgi. Álemdegi jaǵdaı, qańtar oqıǵasy jastardy eldi, jerdi súıýge tárbıeleý qajettigin kórsetip jatyr. Bizge naǵyz patrıottar kerek, onsyz Máńgilik el ulttyq ıdeıasyn júzege asyrý múmkin emes», - dedi ardager.
Zapasqa shyǵarylǵan áskerı qyzmetshilerdi áskerı orkestrdiń áýenimen súıemeldep qarsy alǵan temirjol boıy naǵyz merekelik alańǵa aınaldy.
«Men desanttyq-shabýyldaý batalonynda granata atqysh mamany bolyp qyzmet ettim. Bastapqyda aýyr bolǵany ras, keıinirek bárine úırendim. Qyzmet barysynda parashıýtpen jeti ret sekirdim», - dedi gvardııa qatardaǵy jaýyngeri Bekzat Orynbasar.
Týystary men jaqyndary onyń shymyrlanǵan symbaty men seniminiń artqanyna tań qaldy. Árıne, bul – komandırlerdiń, serjanttardyń, nusqaýshylardyń jáne sarbazdardyń jumystarynyń nátıjesi.
Áskerden kelgen sarbaz Álisher Tastybaıdyń ájesi shynaıy qýanyshymen bólisti.
«Meniń nemerem Qonaev garnızonyndaǵy desanttyq-shabýyldaý brıgadasynda qyzmet etti. Ol kóp nárseni úırenip, parashıýtpen de sekirýdi meńgerdi. Bólim komandırine bizben baılanys ornatqany, jańalyqtaryn aıtýǵa múmkindik bergeni úshin kóp rahmet», - dedi Kúlpan Shaısultanova.
Temirjol boıyndaǵy osynaý oqıǵaǵa kýá bolǵandardyń bári qýandy. Túr-tulǵasyn erekshelep turatyn kógildir beret kıgen desantshylarǵa balalar qyzyǵa qarady.
Foto : gov.kz