Astanalyqtar Arys turǵyndaryna 200 mln teńge aýdardy
«Memleket basshysynyń tapsyrmasymen Arys qalasynyń turǵyndaryna kómek kórsetý jáne qalany qalpyna keltirý boıynsha birqatar jumys júrgizilip jatyr. Qala ákiminiń orynbasary Nurlan Nurkenov qurylys brıgadalarymen birge Arys qalasyna barady. Túrkistandyq áriptestermen birge turǵyn úıler men basqa da ınfraqurylym obektilerin qalpyna keltirý jumystaryn bastaıdy. Ol jerde bizdiń shatyr-lagerlerimiz bolady», - dep jazdy elorda ákimi áleýmettik jelidegi paraqshasyna.
Sonymen birge, ákim Arys qalasynyń zardap shekken turǵyndaryna bir kúndik jalaqysyn aýdaryp, qoldaý kórsetken qyzmetkerge jáne qala turǵyndaryna alǵys bildirdi. Búginge deıin memlekettik organdardyń, qalalyq mekemeler men kásiporyndardyń qyzmetkerleri Arys turǵyndaryna jalpy somasy 200 mln teńge aýdardy. Azamattar tarapynan arystyqtarǵa kómek retinde «Nurly-Astana» qoryna áli de qarjy aýdarý jalǵasýda.
Arys qalasynyń 500-ge jýyq balasynyń jazǵy demalysyn astanada ótkizýdi qolǵa aldyq. Olarǵa qalamyzdyń kórikti jerleri boıynsha ekskýrsııalar, merekelik kontsertter uıymdastyrylady. Bul sharalar 1 shilededen bastalady. Eýrazııalyq ulttyq ýnıversıteti balalardy jatyn orynmen qamtamasyz etip, jataqhanalaryn usynyp otyr. Sonymen birge, balalarǵa qajetti zattar, kıim, mektep qural-jabdyqtary syılanady.
«Halyqtyń birligi osyndaı qıyn sátterde tanylady. Elimizdiń árbir azamaty Arys qalasynyń turǵyndaryna alańdaýshylyq bildirip otyr. Astanalyqtar da zardap shekkenderge kómek kórsetýden shet qalmaıdy», - deıdi Altaı Kólginov.