Astanalyq polıtsııanyń rota komandıri sotqa para bermek bolǵan

ASTANA. QazAqparat - Astana qalasy boıynsha Sybaılas jemqorlyqqa qarsy qyzmet Astana qalasy Polıtsııa departamentiniń jol-patrýldik qyzmeti rotasynyń komandırine qatysty sotqa deıingi tergeý júrgizýde, dep habarlaıdy QazAqparat.

Antıkordyń jazýyna qaraǵanda, rota komandıri azamattyq is boıynsha oń sheshim qabyldaǵany úshin prokýratýra janyndaǵy materıaldyq-tehnıkalyq qamtamasyz etý basqarmasynyń burynǵy qyzmetkeri «J» arqyly sot júıesiniń qyzmetkerlerine iri mólsherde para bermek boldy dep kúdikke ilingen.

«J» prokýratýrada ákimshilik laýazymdy atqara otyryp, jedel qyzmetker bolmaǵan. Qylmys jasaý kezinde jumyssyz bolǵan.

«8 maýsymda tergeý sotynyń sanktsııasymen atalǵan adamdar qamaýǵa alyndy.

Sotqa deıingi tergep-tekserý jalǵasýda.

QR QPK 201-babyna sáıkes tergeý múddesi úshin ózge aqparat jarııa etýge jatpaıdy», - dep jazdy vedomstvodan.