Astanalyq oqýshylar qalanyń biregeı nysandary týraly kitap shyǵardy

ASTANA. QazAqparat - Elordada «Astananyń jalpyulttyq kıeli oryndary» atty kitaptyń tanystyrylymy ótti. Kitapty «Rýhanı jańǵyrý» bardarlamasy aıasynda Bilim basqarmasy men Oqýshylar saraıy birlesip shyǵarǵan. Bul týraly qala ákimdiginiń resmı saıtynda habarlandy.

Elordadaǵy nysandardyń tarıhyn zertteı kele Oqýshylar saraıynyń «Jas ólketanýshylar» úıirmesiniń tárbıelenýshileri osy kitapty qarapaıym ári túsinikti tilmen jazyp, mádenı nysandardyń sýretterin qosqan. Oǵan bas qalamyzdaǵy tarıhı mándi, rýhanı qundy jıyrma nysan engen. Olardyń qatarynda Q.Qýanyshbaev atyndaǵy Memlekettik akademııalyq qazaq mýzykalyq drama teatry, Sáken Seıfýllın atyndaǵy mýzeı, «Báıterek» monýmenti, «Máńgilik el» qaqpasy jáne taǵy basqa nysandar bar.

«Kitap «Jas ólketanýshylar» úıirmesi tárbıelenýshileriniń eńbegi. Negizi kitap shyǵaramyz demedik. Qala tarıhyn tereńinen bilý maqsatynda úıirmege kelip júrgen balalarǵa ózderi qalaǵan bir nysanmen tanysyp, ǵylymı jumys jazýdy usyndyq. Balalar úlken qyzyǵýshylyq tanytyp, aqparatty ınternetten ala salmaı, ár nysanǵa baryp, tarıhymen tanysty. Ózderine de tanymdyq jumys boldy. Sodan keıin osy nysandar tarıhyn basqa da balalar bilsin, tanyssyn degen nıetpen kitap etip shyǵarý usynyldy. Bilim basqarmasy bizdiń usynysty qoldady», - dedi Oqýshylar saraıy dırektorynyń oqý jáne tárbıe isi jónindegi orynbasary Nábıbolla Dosbolov.

Kitaptyń taralymy - júz dana.