Astanalyq neırohırýrgter Aqsholaqovtyń jetekshiligimen 5 myń ota jasady

ASTANA. QazAqparat - Qazaqstanda Ortalyq Azııada buryn-sońdy qoldanylmaǵan neırohırýrgııa salasyndaǵy 60-tan astam tehnologııa engizildi.

Bul týraly búgin Aqordada Elbasy Nursultan Nazarbaevtyń qolynan «Qazaqstannyń Eńbek Eri» ataǵyn alǵan «Ulttyq neırohırýrgııa ortalyǵy» AQ-nyń basqarma tóraǵasy Serik Aqsholaqov aıtty, dep habarlaıdy QazAqparat.

«Ǵasyrlar boıy arman bolǵan jáne de jarqyn bolashaǵymyz úshin Sizge rahmet aıtýǵa ruqsat etińiz. Sizdiń áleýmettik saıasatyńyz densaýlyq salasynyń ósýine zor áser etti. Sonyń bir jarqyn kórinisi - Ulttyq neırohırýrgııa ortalyǵy. Osy 8 jyl ishinde elimizde Ortalyq Azııada qoldanylmaǵan 60-tan astam jańa tehnologııany tájirıbege engizip, 5 myńdaı operatsııa jasadyq. Búginde tolyǵymen eń joǵary sapaly kómek kórsete alamyz. Keleshekte osy isti jalǵastyrýǵa biz daıynbyz», - dedi ol saltanatty shara barysynda. 

Dál osy ataqqa ıe bolǵan «Qarasý» SÓK» JShS bas dırektory Almat Tursynov óz sózinde Elbasynyń júrgizip otyrǵan saıasatynyń arqasynda elimiz búkil álemge tanylǵanyn basa aıtty.

«Búgin men úshin óte qýanyshty kún. Sizge meniń eńbegimdi baǵalap, joǵary memlekettik nagradany tapsyrǵanyńyz úshin alǵysymdy bildiremin. Siz júktegen josparlardy bar kúshimizdi salyp jasaıtyn bolamyz», - dedi Tursynov.