Astanalyq kásipker Golovkınge erekshe syı daıyndady
«Jalpy, Gennadıı Golovkın meni qarapaıymdylyǵymen, búkil jetistikke jetken tolaǵaı eńbegimen, qaıtpas qaısarlyǵymen, aldynda qandaı úlken syndar tursa da búlk etpes salqynqandylyǵymen tamsandyrady. Osydan keıin boksshymyzǵa qoldaý birdirýge nıet bildirdik. Tileýin tileýdiń eki joly bar: biri ishteı rıza bolyp, Gena batyrymyz jeńse dep tilesek, ekinshisi tileýiń men qoldaýyńdy isiń arqyly bildirý, bálkim janynda júrip jaqsy sóz aıtý. Al endi biz boksshymyzdyń janynda júrmesek te, ulttyq naqyshtaǵy etik jasap, artynda eli bar ekendigin bildirgimiz keldi», - deıdi Samǵaý Násiphan.
Etiktiń syrty sıyrdyń, ishi eshkiniń terisinen tigilgen. Tabany túgelimen teriden, taza materıalmen jasalǵan etik bir aıdyń ishinde daıyn bolypty. Tabanyndaǵy shegelerdiń bári tolyǵymen mystan soǵylǵan.
«Gennadıı Golovkınge etik tigý arqyly da ózimizdiń ulttyq ónimimizdi de nasıhattaýdy kózdedik. Qazirgi zamanda meniń oıymsha, shyn eńbekke bet burǵan adam óziniń jolyn tabady. Meniń maqsatym - shynaıy otandyq ónimdi qalyptastyrý», - deıdi etikshi.
Samǵaý Násiphan shyn ómirde Genadıı Golovkındi kórmegenin aıtady. Jer sharynyń arǵy bóliginde júrgen boksshyǵa bul syıdy qalaı tabystaý kerek? Baıypty jas kásipker ol jaǵyn da eseptep otyr eken. Aılap tigilgen aıryqsha syıdy ebin taýyp tabystarmyz deıdi.
«Gennadıı Golovkın búkil Qazaqstan jastaryna úlgi bolǵannan keıin etik tigerde klassıkalyq úlgini tańdap aldyq. Ústińgi jaǵyn ulttyq úlgimen, astyńǵy tusyn zamanǵa saı etip ázirledik. GGG árpin áý basta altynnan soqsaq dep oıladyq ta, materıaldyq jaǵdaıymyz jetpedi. Qazaqtyń altyn jigiti dep, altynnan soqsaq degen nıetimiz bar edi. Biraq, sodan keıin jarqyrap eldiń aldynda júrgennen keıin aq bylǵarymen tigýdi oıladyq», - deıdi ol.
Jalpy, etikshilik ekiniń biri qolynan bara bermeıtin kásip ekeni belgili. Etik tigý asqan sheberlikti, erik-jiger men yjdaǵattylyqty talap etedi. Erte zamanda qazaqtyń etikshileri qarapaıym quraldarymen aıaq kıimderdiń alýan túrin tigetin bolǵan. Burynǵynyń izin jalǵaǵan Samǵaý ulttyq etikshilik ónerine ózindik órnegimen kelip otyr.
«Eýropada 3-4 ǵasyr buryn aıaqtaryna ne kıetinin bilmeı júrgen kezde qazaqtar teriden tigiletin etiktiń túr-túrin kıip júrgen ǵoı. Óksheniń qalaı qalyptasýyn retteı tigý ádisi degen Orta Azııadaǵy ata-babalarymyzdan qalyptasyp kele jatyr eken. Sebebi, adam atqa mingen kezde ókshesi úzeńgini tirep otyrý kerek eken. Etik úzeńgiden ótip ketse, adam óte qaterli jaǵdaıǵa dýshar bolǵan. Etik tigý óneri adamdardyń atty qolǵa úıretýinen bastalǵan ǵoı. Jalpy, etikshilik óneri erteden bizdiń halyqta atadan balaǵa mıras bolyp kele jatqan óner. Etikshilikke qazir Qazaqstanda kóptiń uıalatyndaı kásiptiń túri retinde qaraıtyny jasyryn emes. Joq! Men men etikshiliktiń tańdaýly, qadirli de qasterli kásip ekenin kórsetkim keledi», - deıdi Samǵaý Násiphan.
Etik tiger aldynda jas kásipker Golovkınniń aıaq kıiminiń ólshemin de bilip alypty. Aqparattyq qoldaý bildirip otyrǵan belgili bloger Órken Kenjebektiń kóp kómegi tıgenin aıtady.
«Qazirgi tańda Astananyń irgesinde Qaraótkelde úlken tseh salyp jatyrmyz. Jobanyń quny shamamen 30-40 mıllıon teńge bolady. Osy kúzde, bolmasa kóktemge taıaý tseh ashylady. Jalpy, úlken maqsatymyz - básekege qabiletti otandyq ónimdi shyǵarý jáne baladan balaǵa erteńin oılaıtyn urpaqtan urpaqqa qalatyn úlken kásip qaldyrsam degen nıette bolashaǵymyzdy oılap jumys jasap jatyrmyz. Shyn nıetimiz, alǵa qoıǵan úlken mıssııamyz osy. Paıda ózime de, halyqqa da tıse deımin. Osy maqsatta úlken tsehymyzdyń qurylysyn júrgizip jatyrmyz», - deıdi Samǵaý Násiphan.