Astanalyq ardager-zeınetkerler sýda júzýden jarysty

ASTANA. 1 naýryz. QazAqparat - Búgin Astana qalasyndaǵy «Dınamo» sport kesheninde Týrızm, dene tárbıesi jáne sport basqarmasy men qalalyq Ardagerler keńesiniń uıymdastyrýymen qaladaǵy 60 jastan asqan ardager-zeınetkerler sýda júzýden saıysqa tústi, dep habarlady Astana qalasynyń resmı saıty.

«Bul is-shara Memleket basshysy Nursultan Nazarbaevtyń Qazaqstan halqyna arnaǵan ótken jylǵy Joldaýy aıasynda, salaýatty ómir saltyn qalyptastyrý jáne aǵa býyn ókilderin sportpen belsendi aınalysýǵa tartý maqsatynda uıymdastyrylyp otyr. Budan bólek, elordada ardagerler úıin ashý máselesin qala ákiminiń qaraýyna usyndyq. Eger usynysymyz ákimdik tarapynan qoldaý taýyp jatsa, ardagerlerdiń bir ortada bas qosyp, áńgime-dúken qurýyna múmkindik týar edi», - deıdi qalalyq Ardagerler keńesiniń tóraǵasy Beken Álimjanov.

Jarysqa Almaty, Saryarqa jáne Esil aýdandarynan barlyǵy 54 ardager qatysty. 60-65 jáne 65-70 jastaǵy erler, 58-60 jáne 60-63 jastaǵy áıelder eki topqa bólinip, jarysqa tústi. Aıta ketý kerek, áıelder arasynda jasy ulǵaısa da ózderin áli tyń sezinetin 78 jastaǵy Bátıma Qusaıynova men 75 jastaǵy Lena Bısalıeva da bar.

Saıysqa «Dınamo» sport kesheni demeýshilik jasap, tóreshiler brıgadasy men medıtsına qyzmetkerleriniń qyzmetin uıymdastyrdy.

Qorytyndysynda 60-65 jas aralyǵyndaǵy erler saıysynda 1-shi oryndy A.Kúdebaev, 65-70 jas aralyǵynda T.Qozybaev jeńip aldy. Áıelder saıysynda júlde 58-60 jas aralyǵynda M.Qasymovaǵa jáne 60-63 jas aralyǵynda B.Qusaıynovaǵa buıyrdy.

Al jalpy komandalyq esepte 9 júldeli oryndy ıelengen Esil ardagerleri birinshi orynǵa shyqty.