Astanalyq 8 jastaǵy shahmatshy Latvııanyń eks-mınıstrin jeńdi
Latvııanyń burynǵy ekonomıka mınıstri jáne qarjy mınıstri, qazirgi FIDE atqarýshy dırektory Dana Reıznıtse-Ozola Almaty jáne Astana shahmat akademııalarynyń 24 oqýshysymen bir mezgilde oıyn sessııasyn jáne Almatydaǵy aǵymdaǵy álem chempıonatynyń áıel qatysýshylary úshin sheberlik synybyn ótkizdi.
«Men shahmattan maqsatyma jetý, kóp eńbek etý jáne ýaqytty baǵalaý sııaqty kóp nárseni úırendim. Shahmatta ǵana emes, ómirde kóp jetistikke jetkińiz kelse, bul oıyn sizge kómektesedi. Tek kóp eńbek etý kerek, sonda ǵana jetistikke jetesiz» - dedi Dana Reıznıtse-Ozola sessııanyń jas qatysýshylaryna.
Chesstar Chess shahmat mektebiniń oqýshysy 8 jasar Kárim Aıtjannyń taqtasynda grossmeıster ádettegiden uzaǵyraq turyp, óziniń júrisi týraly uzaq oılandy. Nátıjesinde 8 jasqa deıingi Qazaqstannyń kúmis júldegeri jáne blıtsten Azııanyń kúmis júldegeri Kárim Aıtjan grossmeıstermen oıynda jeńiske jetti.
«Men jeńetinime senimdi bolmadym jáne grossmeıstermen oınaýdyń artyqshylyqtaryn kórdim, tipti teń oıyndy usyndym, biraq keıinirek men oıynnyń baǵytyn ózgerte aldym. Árıne ońaı bolǵan joq. Shebermen oınaý qıyn», – deıdi jas shahmatshy.
Aıta keteıik, Almatydaǵy Balýan Sholaq atyndaǵy sport jáne mádenıet saraıynda shahmattyń rapıd jáne blıts túrinen álem chempıonaty ótip jatyr. Jahandyq dodaǵa 50 eldiń úzdik 290 shahmatshysy qatysady. Ashyq týrnırge 176 oıynshy qatysady. Saıystyń favorıti sońǵy 10 jyldaǵy álem chempıony Magnýs Karlsen (Norvegııa). Áıelder týrnırinde 100-den astam sportshy baq synaıdy. Qazaqstannyń namysyn álemge áıgili shahmatshylar Jansaıa Ábdimálik pen Bıbisara Asaýbaeva qorǵaıdy.
Foto: Qazaqstan tennıs federatsııasy