Astanalyqtar jaryqsyz qaldy: apattyń aldyn ala sebebi ataldy

<p>Astana ákimdigi keshe keshke bolǵan jaryqtyń jappaı sónýine túsinik berdi, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

«Keshe saǵat 21.57-de qalalyq 10 qosalqy stantsııa isten shyqty. Saldarynan qalanyń negizinen oń jaǵalaýyndaǵy turǵyn úıler jaryqsyz qaldy. Ári qaraı saǵat 23.00-áýejaı qosalqy stantsııalar iske qosyldy. Saǵat 23.10-da Báıterek qosalqy stantsııasy iske qosyldy. Túngi saǵat 2.00-ge deıin barlyq qosalqy stantsııalar jumys istep turdy», - dedi Astana qalasy ákiminiń birinshi orynbasary Nurlan Nurkenov Astana qalasy kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, 2-shi stantsııasynda tehnologııalyq buzýshylyq bolǵan joq. JEO-2 shtattyq rejımde jumysyn jalǵastyrdy jáne jalǵastyryp jatyr.

«Tótenshe jaǵdaı jetekshi jelilerde boldy. Apattyń aldyn ala sebebi – kabeldiń úzilýi jáne shkaftardyń biriniń órtenýi. Bul shtattan tys jaǵdaı boldy, túngi saǵat 2-de barlyq abonent elektr qýatymen qamtamasyz etildi. 2 saǵat boıy qalanyń oń jaǵalaýyndaǵy keıbir áleýmettik nysandarda jaryqsyz qaldy. Barlyq medıtsınalyq nysan boıynsha dızel-generatorlar iske qosylyp, ýaqytsha jaryq berildi. Tótenshe jaǵdaı kezinde dızel reanımatsııany jáne operatsııalyq bloktardy qamtamasyz etti. Medıtsınalyq mekemelerdegi qyzmetke qaýip tóngen joq», - deıdi ol.