Astanalyqtar Parıj Olımpıadasynyń ashylý saltanatyn ashyq aspan astynda tamashalaı alady

<p>ASTANA. KAZINFORM &ndash; Búgin Parıj-2024 Olımpıadasy saltanatty túrde ashylady. Jibek Joly telearnasy elorda turǵyndary men qonaqtary úshin Parıj Olımpıadasynyń ashylý saltanatyn tikeleı efırde, ashyq aspan astynda tamashalaýdy usynady.&nbsp;</p>

«Bizdiń telearna úshin Parıj Olımpıadasyn tikeleı kórsetilimde taratý — tarıhı oqıǵa. Halyqaralyq Olımpıada komıtetine sporttyq oıyndardy taratatyn telearna retinde resmı tirkeý jóninde ótinim joldadyq. Eki aptanyń ishinde tirkedi. Kelisimge sáıkes Olımpıada oıyndaryn tikeleı kórsetilim arqyly kópshilikke tarata alamyz. Jibek Joly telearnasynyń kórermenderi ár juma, senbi jáne jeksenbi kúni (saǵat 22:00–ge deıin) teledıdardan bólek, elordadaǵy Abu Dhabi Plaza oıyn-saýyq jáne saýda ortalyǵy aýmaǵynda LED ekran arqyly kóre alady», — deıdi Jibek Joly telearnasynyń kreatıvti prodıýseri Dınara Abakaeva.

Búgin saǵat 22:30-da Jibek Joly telearnasy elorda ákimdiginiń qoldaýymen Parıj Olımpıadasynyń ashylý saltanatyn ortalyq saıabaqta tikeleı efırde kópshiliktiń nazaryna usynady. Saltanatty shara aıasynda kontsert te ótedi.

Buǵan deıin Jibek Joly telearnasynyń Parıj Olımpıadasynan tikeleı translıatsııaǵa daıyndyq jumystary týraly aıtyp bergen edik. Telearna efıriniń shamamen 70 paıyzy Parıj Olımpıadasy oıyndaryna arnalady. 

Olımpıada kestesine sáıkes, telearna kórermenderi 27 shilde kúni saǵat 15:00-de úlken tennısti tamashalaı alady, al saǵat 23:30-da júzýden jartylaı fınal jáne fınal ótedi.

28 shilde kúni saǵat 12:30-da semserlesý, saǵat 17:10-da sporttyq gımnastıkadan erler arasynda fınal ótedi jáne saǵat 22:00-de semserlesýden fınal kórsetiledi.