Astanalyq zeınetkerler arasynda úzdik shahmatshy anyqtalady
Elordada 2022 jyly ashylǵan «Belsendi uzaq ómir súrý ortalyǵynda» qurmetti eńbek demalysyna shyqqan egde azamattar bos ýaqytyn tıimdi ótkizýge tyrysady. Alǵashqy jyly 6 myń adam ǵana tirkelse, qazirgi tańda ortalyqqa kelýshilerdiń sany 14 myńǵa jýyqtaıdy. Bul jerde zeınetkerler áleýmettik-saýyqtyrý, áleýmettik-medıtsınalyq, áleýmettik-ekonomıkalyq, áleýmettik-eńbek, bos ýaqyt ótkizý baǵytynda áleýmettik qyzmet túrlerin ala alady.
Merekege oraı, Almaty aýdanynda shahmat básekesinen jeńimpazdardy anyqtaý maqsatynda zeınetkerler bas qosty. QR Eńbek jáne halyqty áleýmettik qorǵaý vıtse-mınıstri Oljas Anafın qarııalardy arnaıy quttyqtady.
«Ákimshilik tarapynan «Belsendi uzaq ómir súrý ortalyǵynyń» ashylǵany óte durys boldy dep sanaımyn. Ózim 2022 jyldan beri osy jerge kelip, qatarlastarymmen ýaqyt ótkizýge tyrysamyn. Kóptegen úıirmeler bar jáne osy jerge kelgenniń arqasynda jańa qyrlarymdy ashyp jatyrmyn. Shahmatpen bala kezden aınalysyp kelemin. Qalalyq deńgeıdegi jarystardy jibermeýge tyrysamyn. Jattyǵýdyń arqasynda bıyl Senate Open respýblıkalyq jarysynyń jartylaı fınalyna deıin jettim. Ortalyqta da myqty shahmatshylar bar. Bos ýaqytymda shahmatpen aınalysyp, jańa adamdarmen tanysyp jatyrmyn. Budan bólek, bachata bı túrin de meńgerýdemin», - dedi 73 jastaǵy Gamıat Nasyrov.
Shahmat básekesinde júldegerler rapıd túri boıynsha aınalmaly júıede belgili bolady. Jalpy qalanyń 5 aýdanynda 180-nen astam zeınetker shahmatty serik etken.
Zeınetkerler ortalyqta tek shahmat qana emes, sondaı-aq, ıoga, aıkóne, kompıýterlik saýattylyq, aǵylshyn tili jáne t.b. 22 túrli úıirmege qatysa alady.
Astanadaǵy 5 aýdanda ortalyqtyń 5 fılıaly bar. Olar Almaty aýdany boıynsha R.Qoshqarbaev kóshesi, 29/1, Baıqońyr aýdany boıynsha Abaı dańǵyly, 46, Esil aýdany boıynsha Dostyq keshesi, 13, Saryarqa aýdany boıynsha Beıbitshilik kóshesi, 25 jáne Nura aýdany boıynsha Tóle bı kóshesi, 44 mekenjaıynda ornalasqan.