Astanalyq oqýshylar este saqtaý qabileti bar aqyldy rozetka jasap shyǵardy

<p>ASTANA. KAZINFORM &ndash; Sáken Seıfýllın atyndaǵy № 80 mektep-gımnazııasynyń talantty oqýshylary Aqbota Melıs men Omar Djýsýpbek erekshe joba jasap shyǵardy, dep habarlaıdy elorda ákimdiginiń resmı saıty.</p>

SMART SOCKET dep atalatyn bul qurylǵy Qazaqstanda alǵash ret jasaldy. Ony telegramm bot arqyly kez kelgen qashyqtyqtan basqarýǵa bolady. Eń bastysy, bul rozetkanyń este saqtaý qabileti bar jáne ol Bluetooth pen Wi-Fi arqyly tolyqqandy jumys isteıdi. 

SMART SOCKET erekshelikteri:

- Este saqtaý qabileti: Qurylǵy qosylyp turǵan qurylǵylardy jáne sońǵy parametrlerin esinde saqtaıdy, bul ony qoldanýdy qaýipsiz ári yńǵaıly etedi.

- Qosymsha múmkindikter: Telegramm bot arqyly kez kelgen qashyqtyqtan basqarý. 

- Jelilik qosylý: Bluetooth arqyly jaqyn qashyqtyqta jumys istese, Wi-Fi arqyly qosylýǵa bolady. 

- Energııa tıimdiligi: Qýat tutynýdy naqty ýaqytta baqylap, qajettilikterge qaraı baptaýǵa múmkindik beredi.

- Qaýipsizdik:Tótenshe jaǵdaılardy anyqtap, qaýipterdi aldyn ala eskertý.

- 3D tehnologııalar: Qurylǵynyń prototıpi 3D prınterden jasalyp, barlyq synaqtan sátti ótti.

– SMART SOCKET – bul tehnologııany adamnyń ıgiligi úshin qoldanýdyń aıqyn úlgisi. Biz jobany ázirleý kezinde úlken tájirıbe jınadyq, ári adamdardyń ómirin jeńildetýdi maqsat tuttyq», - deıdi joba avtorlary Aqbota men Omar.

Joba jetekshisi, ınformatıka pániniń muǵalimi Janargúl Baıkenjeeva SMART SOCKET jas býynnyń shyǵarmashylyq áleýetiniń nátıjesi ekenin aıtty. Ol sondaı-aq bolashaqta atalǵan jobany ár úıge qoljetimdi etip, onyń múmkindikterin odan ári arttyrýdy josparlap otyrǵanyn jetkizdi.